QaraFest – авторлық деректі фильмдер фестивалі. Көзбен көруге, көңілге түюге, зерттеуге, таным көкжиегінде зерделеп, тың болмысты тануға мүмкіндік беретін фестиваль.

Аталмыш кинофестиваль 2020 жылы қоғамдағы эпидемиологиялық жағдайға байланысты онлайн форматта өткен болатын. Осыған қарамастан «Qara film festival» тәуелсіз деректі кинофестивалінің аясы кеңейіп, АҚШ, Ұлыбритания, Италия, Швейцария, Македония, Дания, Украина сынды елдердің ең үздік сегіз деректі фильмдерін 2200-ден астам көрерменге ұсынған болатын. 

Фестиваль бағдарламасында Чили, Түркия, Швеция, Германия, Норвегия, Финляндия, Грузия, Бельгия, АҚШ және Румыниядан 10 туынды бар. Барлық фильмдер түпнұсқа тілінде, қазақ және орыс субтитрлерімен көрсетіледі. 

Көрсетілімдер Сорос-Қазақстан қорының және Нидерландтық movies That Matter кинофестивалінің гранттар бағдарламасының қолдауымен ұйымдастырылды.

Биыл QaraFest халықаралық фестивалі аясында көрсетілетін фильмдер тірі тіршіліктің, қас-қағым сәттің, кадрдағы шынайы өмірдің куәгері болуға шақырады, шығармашылық ләззат алып қана қоймай, бүгінгі шынайы болмысты жан-жақты бақылауға мүмкіндік береді.

Фильм бағдарламасы – бұрын-соңды көзге таныс болмаған, әйтсе де шынайы өмірді бейнелейтін өзге тағдырды, өзгеше кейіпкерлерді қамтиды.

Ескерту: Әр көрсетілімге 100 көрерменнен ғана кіре алады, ал билеттерді Ticketon-нан, я болмаса, көрсетілім болатын күні «Арман» кинотеатрының кассасынан сатып ала алады. 

madeniportal.kz