Францияда аптап ыстықтан үш аптада 1200-ден астам адам жұмған

Францияда шілде айында болған аптап ыстық кезінде 1,2 мыңнан астам артық өлім жағдайы тіркелді. Мамандар жоғары температура халық денсаулығына айтарлықтай әсер еткенін мәлімдеді, деп хабарлады MadeniPortal.kz.

Oxu.Az басылымының Le Figaro-ға сілтеме жасап хабарлауынша, Францияның қоғамдық денсаулық сақтау агенттігі (Public Health France) 3-22 шілде аралығында елді қамтыған аптап ыстықтың екінші толқыны кезінде 1 243 артық өлім жағдайы тіркелгенін хабарлады.

Дегенмен мамандар бұл адамдардың барлығы тікелей аптап ыстық салдарынан қайтыс болды дегенді білдірмейтінін ескертті. Әңгіме қалыпты жағдайда күтілетін көрсеткішпен салыстырғандағы барлық себептен болған өлім-жітімнің артуы туралы болып отыр.

Алдын ала есеп бойынша, жаз басталғалы Франциядағы жоғары температура шамамен 7 300 артық өлім жағдайымен байланысты болуы мүмкін.

Ең жоғары көрсеткіш 17-30 маусым аралығындағы алғашқы ауқымды аптап кезінде тіркелген. Сол кезеңде 5 764 артық өлім жағдайы анықталған. Бұған дейін, 24-28 мамырдағы ыстық толқыны кезінде тағы 300-ге жуық жағдай тіркелген.

Осылайша, шілдедегі аптап маусымдағы ыстықпен салыстырғанда өлім-жітім көрсеткіші бойынша төмен болған. Соған қарамастан, мамандар жоғары температураның халық денсаулығына әсері әлі де елеулі екенін атап өтті.