Әлеуметтік желіде Алматы көшелерінің бірін тазалап жүрген әжейдің видеосы көпшіліктің назарын аудартты. Ақсандап, шаруа арасында демалған кейуананың жағдайына қазақстандықтар немқұрайлы қарамай 815 мың теңге несиесін төлеп, баспана сыйлады. Stan.kz тілшісі әженің қазіргі күйін білу мақсатында отбасымен тұрып жатқан үйіне барып қайтты. 

Қазақстандықтардың жүрегін селт еткізген видеоны түсірген жиырма жастағы – Жансая Атемкүл. Көше сыпырып жүрген кейуананы көргенде жаным ашыды дейді. 

“Мен жолда өтіп бара жатқан кезде апаны көріп қалдым.  Баяғы ауылдағы апаларға ұқсатып қарап қалдым. Жаным ашып кетті. Себебі үлкен кісі, жастармен бірге ауыр жұмыс істеп жатыр. Барлығы менен сұрай бастады “қандай кісі, не үшін түсірдіңіз?” деп. “Түсіруге болмайды, ол кісі намыстанып жұмыс істемей қояды” деді. Ал мен керісінше видеоның көбірек қаралым жинағанын қаладым. Себебі өте ауыр жұмыс, жасы 85-те деп ойлап қалдым, бірақ жасы 65-те екен ” – дейді Жансая.

Видео әлеуметтік желіде миллиондаған қаралым жинап, адамдар түрлі пікір жазысты. 

“Зейнетке шыққан шағында, бейнет көргені мемлекеттке сын емес пе?”, “Әппақ әжем, қайтсін енді ақша керек”, “Обал, баланы туды, бақты, қартайғанда осылай жүргені... Апамыз аман болсын!”, – деп жазды желідегілер.

Зейнет жасында мұнша бейнет көретіндей қарияның басына не күн туғанын үйіне барып білдік. 65 жастағы Айсәуле Байқуатова таңмен таласа тұрып, қала көшелерін жинайды. Жолдасы жаман аурудан көз жұмып, жастайынан жесір қалған. Бірақ жоқшылықтың  күйін әлі кешіп келем деп күйінеді кейуана. Ұлымның тапқан табысы күнкөріске  жетпегендіктен, табыс табуға мәжбүр. Жұмысқа шықпай қалған күндері нансыз қалып, тамақты несиеге аламыз дейді. 

“Сағат бес жарымда үйден шығамын, алты жарымда жұмысқа жүріп кетеміз. Бір түйір баламның табысы жетпейді. Сонша баласы бар.  Шыдай алмай жұмысқа шығып кеттім. Қыздармен күн көрдім. Күнкөріс төмен болды. Кредитіміз де көбейіп кетті. Нанға да кредит алдық. Балаларымыз аш боп  қалмасын деп. Қатты қиналып кеттім. Демалсам нан болмай қалады. Жұмыста үлкен кемпірлер  конфет береді, шәймен іш деп. Тамағымнан өтпейді, алып қоям. Неге жемейсің дейді басқалар. Мен оны балаларыма беремін. Немерелерім аш болмасын деп”, – дейді әже.

Айсәуле апа ұлы Құралбек Алданазаровтың қолында тұрады.  Ұлының  ай сайынғы табысы  несие төлеуге кетсе, келіні Жүзімгүл Сайтмұратова үйде бала тәрбиесімен айналысады.  Апаның  зейнетақысы 66 мың теңге. Ал жұмысынан ай сайын жалақы алмайды. Күндік жұмысына 5000 теңге береді.  Апаның қиын жағдайын көрген  Жансая Атемкүл арнайы шот ашып 815 мың теңге несиесін жауып берді. 

“Өтірік фейк акаунттан  апаға  сбор ашылған. Кейбір кісілер өздерінің карталарын жазған. Сосын мен жүздей адамның акаунтын өшіріп, өзім шот ашам деп шештім. Апа мені көрген кезде ұшақтап алды. Алғысын айтты. Ақшаны бермегеннің өзінде бұл кісінің жүрегі сондай кең, соншама жыл жұмыс істеп, дұғаларым қабыл болған шығар деді. Осы кезде менде басқаша сезім болды”, – деді 

Видеодан соң  Айсәуле Байқуатова баспаналы болды. Тар, ескі үйінен кетіп, бала-шағасымен жаңа үйіне орналасты. 

“Үй береді дегенде ойбай, мені біреу сыртымнан түсіріп алмады ма екен. Түсіріп алғанға да рақмет дедім. Беттеріне қарадым балалардың. Өтірік айтпайтын сияқты. Жақсы көрінді көзіме. Біреулер айтты: “сенбе деді”. Неге сенбейді екенмін, жақсы адамдар ғой олар дедім. Қуаным жүрегім, тым жақсы болып кетті. Баяғы жас сияқты болып көріндім өзіме. Жақсы адамдар бар екен ғой деп ойладым” – деп көзіне жас алды. 

Жаңадан берілген үйдің көшесіне жылу құбырлары өткізілмеген. Дегенмен әкімдік әжейдің отбасын биыл отынмен қамтамасыз етуге уәде берді. Келесі жылы құжаттарын реттеуге жәрдемдесетін болады. Айсәуле Байқуатованың ендігі арманы үйінің алдына терек отырғызып,  немерелерінің жанында отыру. 

Сұхбаттың толық нұсқасын YouTube арнамыздан көріңіздер.