Елордада жас жұбайлар алаңы пайда болды. Оның ашылу салтанатында бірнеше жас жұбай ресми түрде неке қидырып, ескерткіш ретінде ағаштар отырғызды,  деп хабарлайды  madeniportal.kz.

Астана әкімдігінің ресми сайтының жазуынша, сквердің ашылуы "Таза Қазақстан. Астана – тазалық пен тәртіптің үлгісі" ауқымды экологиялық акция аясында өтті. Неке қию рәсімінен кейін жас жұбайлар алаңға ескерткіш ағаш отырғызды.

Ұйымдастырушылар атап өткендей, Астананың барлық ерлі-зайыптыларының осындай мүмкіндігі бар. 

Сондай-ақ саябақта енді үйленгендер бақытты күнді еске алу үшін оның шаңырағына құлыптар мен таспаларды бекіте алатындай киіз үй орнатылды.  Алаңның ашылу салтанатында барлығы 5 жұп некеге тұрды.

Іс-шараға 50 жылдық мерейтойын атап өткен ерлі-зайыптылар Марат Тоқсанбаев пен Күләш Асқарова шақырылды. Олар акцияға қатысушыларды құттықтап, батасын берді.

Естеріңізге сала кетейік, экоакцияның осы аптасы "Киелі мекен" деп аталады және тарихи-мәдени ескерткіштердің аумағын абаттандыру жұмыстарына арналған.
Елордада барлық тұрғындардың күшімен Мәдени мұра нысандарының, ескерткіштер мен оларға іргелес аумақтардың қасбеттерін ретке келтіру жұмыстары жүргізілді.

"Жасыл аймақ" үшінші аптасы ағаш отырғызуға, екпелерді ақтауға арналады.

4 мамырға дейінгі кезең "Өнегелі ұрпақ" деп аталады және ардагерлер аулалары мен қарттар үйлерінің аумақтарын тазалауға және абаттандыруға арналады.

Соңғы, бесінші аптада “Мөлдір бұлақ" деп аталатын су айдындары – өзендер мен көлдердің айналасы қоқыстан тазартылады.