/1952 ж. туған/

Əдебиетші, сыншы, публицист, филология ғылымының докторы, профессор, Гуманитарлық Ғылымдар академиясының, Халықаралық Ш.Айтматов академиясының академигі, Қазақстан Жазушылар, Журналистер одақтарының мүшесі, Қазақстан Жазушылар одағы Басқарма мүшесі Қ.Ергөбек 1952 ж. 26 желтоқсанда Оңтүстік Қазақстан облысы, Отырар ауданындағы Ақынтоғай ауылында, шопан отбасында дүниеге келген. Алты жасында əкеден жетім қалды. Балтакөл елді мекенінде мектепке барды. Күйікасарда (Түркістан ауданы), Арыс қаласында оқуын жалғады. 8 сыныпты Арыс кеңшарында, орта мектепті Отырар ауданында аяқтады. Аудандағы Жамбыл атындағы орта мектепті бітірген соң, 1970-1975 жылдары Əл-Фараби /С.М.Киров/ атындағы Қазақ мемлекеттік университетінің филология факультетін оқып, аяқтайды.

1975 жылы Қазақстан Ғылым академиясы М.О.Əуезов атындағы Əдебиет жəне өнер институты бейнелеу өнері бөліміне ғылыми қызметке қалдырылды. 1976 жылы Мəдениет министрлігі жүйесінде аға методист, 1976-1978 жылы «С.Мұқанов музей-үйінің» аға ғылыми қызметкері, 1980-1987 жылы С.Мұқанов музейінің ғылым бөлімінің меңгерушісі, 1978-1980 жылы «Лениншіл жас» /«Жас алаш»/ газеті Əдебиет жəне өнер бөлімі тілшісі, аға тілшісі, 1987-1990 жылы «Социалистік Қазақстан» /Егемен Қазақстан/ газетінің Əдебиет жəне өнер бөлімінде қызметкер, 1990-1992 жылы Қазақстан Ғылым академиясы М.О.Əуезов атындағы Əдебиет жəне өнер институтында аға ғылыми қызметкер, Консерваторияда доцент, «Ақиқат» журналында бөлім меңгерушісі /бір мезетте/, 1992-1997 жылы Қ.А.Ясауи атындағы халықаралық Қазақ-Түрік университетінде доцент, профессор, кафедра меңгеруші, декан, Ректордың ғылым істері жөніндегі орынбасары, «Қазақ əдебиеті» газеті бөлім меңгерушісі, 1997-1999 жылдары Ғылым академиясы М.О.Əуезов атындағы Əдебиет жəне өнер институты «Қазіргі қазақ əдебиеті» бөлімінде Бас ғылыми қызметкер, бөлім меңгерушісі, ЖАК-та (Жоғары аттестациялық комитет) ғалым-хатшы болып қызмет істеді.

1999 жылдың қыркүйегінен Түркістан қаласы əкімінің руханият мəселелері жөніндегі орынбасары, 1999-2003 жылы Оңтүстік Қазақстан облысы Əкімі аппараты бастығының қоғамдық-саяси мəселелер жөніндегі орынбасары, облыс əкімі кеңесшісі болып қызмет атқарды.

Қазіргі таңда ғалым-сыншы Қ.Ергөбек Түркістан қаласында Қ.А.Ясауи атындағы Халықаралық қазақ-түрік университетінің вице-президенті – ҚР Білім жəне ғылым министрінің өкілі.

Қ.Ергөбек əдеби процеске студент кезінен араласты. Талапты жастың ерте қанаттануына университет профессорлары – Б.Кенжебаев, Т.Кəкішев сынды үлкен жүректі ұстаздары ерекше ықпал етті. 1970 жылдардан əдеби сынға араласқан оның ағымдағы баспасөзде осы уақыт аралығында 1000-ға тарта мақаласы жарияланды. «Адасқандар ақиқаты», «Терең тамырлар» повест-зерттеулері, деректі əңгімелері кітап болып шықты. Ол əсіресе Сəбит Мұқанов өмірі мен шығармашылығын дендей зерттеген ғалым. Оның «Жан жылуы» /1981/, «Сəбит Мұқанов» /1989/, «Жақсыдан қалған сөз» /1991/, «Баянғұмыр» /1991/, «Сəбит Мұқанов» /1999/ «Жазушы шеберханасы» /2002/ аталатын сын-зерттеу, монографиялық еңбектері қазақ əдебиеті классигі С.Мұқановтың шығармашылық тағдырына бағышталған.

Бірсыпыра жыл Қазақстан Жазушылар одағында балалар əдебиеті кеңесін басқарған ол республикадағы осы саланың санаулы сыншы, зерттеушісінен саналады. Оның «Мейірім шуағы» /1985/, «Өтебай Тұрманжанов» /1992/ монографиясы, «Арыстар мен Ағыстар» сын кітабы (үшінші томы), «Қазақ совет балалар жазушылары» /1990/ анықтамалығы, «Сөзстан» /1985/ жинағы, «Даланың алыбы мен ғалымы туралы туындылар» /Балалар əдебиеті кітапханасы/, «Сылдырап аққан бұлақтай» /Шынашақ, 1992/ алғысөздері мен көптеген мақалалары қазақ балалар əдебиеті мəселелерін қарастырады.

Қ.Ергөбек хат, күнделік, эссе, естелік секілді мемуарлық жанр-дың да бірден-бір зерттеушісі. Назардан тыс қалып келе жатқан жанр үлгілерін тану, танытуда ол бірсыпыра еңбек етті. «Баянғұмыр» /1991/, «Арыстар мен Ағыстар»(алтыншы кітабы) атты зерттеу кітаптары, «Хат жаздым қалам алып», «Жауынгер жүрегіне от жаққан», «Жүрек қанымен жазылған хаттар» секілді мақалалары қазақ əдебиетінің осындай назардан қаға беріс қалып келе жатқан мəселелеріне арналған.

Қазақ əдебиеттану ғылымында аз зерттелген саланың бірі – шығармашылық шеберханасы (зертхана дейтініміз де бар) болса, Қ.Ергөбек бірсыпыра ғылыми еңбегін осы мəселеге арнаған. «Мөлдір махаббат» романының шығармашылық тарихы» /1991/ аталатын кандидаттық, «С.Мұқановтың шығармашылық шеберханасы» /1995/ аталатын докторлық диссертациясын ол қазақ əдебиеттану ғылымының осындай маңызды мəселелерін зерттеуге арнаған. «Шыңғыс шыңы» /1998/ бауырлас қырғыз елінің шоң жазушысы Ш.Айтматов шығармашылық лабораториясын эпистолярлық жанр үлгілерін пайдалана отырып қарастырудың үлгісі.