Такси бағасы үш есеге қымбаттады: inDrive компаниясына ескерту жасалды

Қазақстанда «Яндекс Go» қосымшасының жұмысындағы ақаудан кейін inDrive арқылы такси шақыру құны күрт қымбаттаған. Осыған байланысты Бәсекелестікті қорғау және дамыту агенттігі компанияға ресми ескерту жасады, деп хабарлайды AMadeniPortal.kz.

11 қазанда «Яндекс Go» сервисінің жұмысы уақытша тоқтап, жолаушылар жаппай inDrive қосымшасына жүгіне бастаған. Сұраныстың күрт артуы мен жүргізушілердің жетіспеуі салдарынан кейбір бағыттар бойынша жол жүру ақысы үш есеге жуық өскен.

БАҚ мәліметінше, қалыптасқан жағдайға байланысты inDrive компаниясы бағаның шарықтауын тежеу үшін бірқатар шара қабылдаған. Атап айтқанда, сервис комиссиясы ең төменгі деңгейге түсіріліп, жүргізушілер мен жолаушылардың ұсынылған жолақыны өзгерту мүмкіндігіне шектеу қойылған.

Алайда бұл жағдай Бәсекелестікті қорғау және дамыту агенттігінің назарынан тыс қалмады. Ведомство компанияға ресми ескерту жолдап, такси қызметінің бағасын негізсіз көтеру жолаушылардың құқықтарын бұзуы мүмкін екенін атап өтті.

Агенттік мұндай әрекеттердің монополияға қарсы заңнама талаптарына қайшы келуі ықтимал екенін ескертті.

Айта кетейік, компанияға берілген ескерту профилактикалық сипатқа ие. Яғни бұл айыппұл салынғанын немесе заң бұзушылықтың түпкілікті дәлелденгенін білдірмейді. Ведомство сервиске бәсекелестік талаптарын сақтап, тұтынушылардың мүддесін қорғау қажеттігін еске салды.