Үркер жасыл желекке бөленді: бір күнде 400-ден астам ағаш егілді

Астананың Нұра ауданындағы Үркер тұрғын алабында 25 сәуір күні «Таза Қазақстан» экологиялық акциясы аясында ауқымды көгалдандыру іс-шарасы өтті. Бұл туралы қала әкімдігінің ресми сайты мәлімдеді, деп хабарлайды MadeniPortal.kz.

Іс-шараға балалар мен жастар, ауданның Ардагерлер кеңесінің өкілдері және Белсенді ұзақ өмір сүру орталығының қатысушылары белсенді атсалысты.

Кезекті акция №94 мектеп маңында ұйымдастырылып, тұрғындар аға буын өкілдерімен бірге ағаш отырғызуға шықты. Нұра ауданы әкімінің орынбасары Әлия Әбсеметованың айтуынша, шараға шамамен 80 адам қатысты.

Бұл күні Үркерде 400-ден астам ағаш отырғызылды. Олардың қатарында алма, алмұрт, тал және басқа да ағаш түрлері бар. Әбсеметованың мәліметінше, соңғы екі-үш аптада аудан бойынша 2 200-ден астам ағаш егілген, жыл соңына дейін бұл көрсеткішті 8 мыңға жеткізу жоспарланып отыр.

Жобаның ерекшелігі – алдын ала өсірілген, 12-15 жылдық көшеттерді пайдалану. Мұндай ағаштар елорданың климаттық жағдайына жақсы бейімделген.

Отырғызу жұмысы басталар алдында қатысушыларға арнайы нұсқаулық беріліп, ағашты дұрыс отырғызу тәсілдері түсіндірілді. Акциядан кейін мамандар атқарылған жұмыстардың сапасын тексеріп, қажет болған жағдайда түзету енгізеді.

Шара көңілді әрі бейресми атмосферада өтті. Қатысушыларға музыкалық сүйемелдеу, шай мен тәтті-дәмді ұсынылды. Көпшілік бұл тек сенбілік емес, адамдардың басын қосатын ортақ іс екенін атап өтті.

Әсіресе, аға буын өкілдері ерекше белсенділік танытты. Олардың айтуынша, мұндай шараларға қатысу – болашаққа қосқан үлес әрі жастарға үлгі.

Ал акция қатысушысы Гүлжанат Шекербаева мұндай бастамалардың адамдар арасында қарым-қатынас орнататынын атап өтті.

Сенбілікке Нұра ауданындағы Белсенді ұзақ өмір сүру орталығының «Атамекен» вокалдық ансамблі де қатысты.

Ұйымдастырушылардың айтуынша, акцияның басты мақсаты – тек ағаш отырғызу емес, қала тұрғындарының қоршаған ортаға деген жауапкершілігін арттыру. Отырғызылған көшеттерге күтім жасау жұмысы алдағы уақытта да жалғасады.

Айта кетейік, осы күні көшет отырғызу жұмыстары Үркер тұрғын алабындағы Бойтұмар көшесінде және №69 мектеп жанындағы скверде де өтті.