Тыныштықбек Әбдікәкімұлы. АҚИҚАТ - ОЙДА

Қазақ - өзінің әулие екенін білмей жүрген әулие.

***

Ашуланған адамның албастысы сөйлейді.

Мейірленген адамның періштесі сөйлейді.

***

Күн қанша жарық болғанмен, ол да - Түн құрсағында.

***

Даналығы жоқ адам да бала тәрбиелей алады. Ал, балалығы жоқ адам - ешқашан.

***

Өзіңді сүй... өзгелер үшін.

***

Тақыр кедейге - бит те қазына.

***

Өмір сүріп жүрген ешкімді көрмедім. Еркектердікі де, ұрғашылардікі де, ақылдылардікі де, ақымақтардікі де, діншілдердікі де, дінсіздердікі де, байлардікі де, кедейлердікі де - құр тірлік. Өйткені, өмір сүрудің мәнісін білмейді. Білгілері де келмейді. Тек, сәбилер ғана жұпар былдырлайды.

***

Бөгеннен аса алмаған ағын су топаннөсерлі бұлтқа айналып ұшып өтеді одан.

***

Рухы әлсіздердің санасы - әзәзілдер меншігі.

***

Жер сатуға Құдайдың ғана қақысы бар. Өйткені, Жерді жаратқан да, ол Жердің Ійесі де - бір Өзі. Алайда, Құдайда саудагерлік пиғыл болмайды. Жерді саудаға салатындар - сайтанданған пенделер!

***

Мен - жаңарып келген бабалар даналығымын. Ол даналықсыз - нөлмін.

***

"Әні-шәні, күләптар. Пошал дереу, күнәһар...".

Қазіргі қазақ "намазы" да - Абай сынаған сол Абралы "намазының" аржақ-бержағы.

***

Қош Үйлесім ғылымын меңгермейінше, "Сайтан" бізді алдап та, сатып та, қорқытып та, қорлап та, өлтіріп те, қызыққа бата береді.

***

Өз Сайтанымнан басқа - досым да, қасым да жоқ.

***

Махаббат жұмағы шекарасының барша тұсы - ашық. Бірақ, Жүрек Қақпасы арқылы ғана өте аласың оған.

***

Ақиқат - Ойда.

Шындық пен жалған - Сөзде.

***

Тағдыры талай ғасыр тапталған ел орнынан бірден тұрып кете алмайды.

***

Сіз жолмен жүріп өтсеңіз, жол да сізбен жүріп өтеді. Басыңыздан өткерген жағдайдың бәрінде - сол заңдылық.

***

Қазақ - өзінің әулие екенін білмей жүрген әулие. Себебі, Тілінің әулиелігінен хабарсыз.

***

Көсегем көгерсін десең, көңіліңді басқара біл.

***

Жауым көбейсін десең, не мана бол, не дана бол.

***

Ажалдың үш хабаршысы - кәрілік, дерт және қатер.

***

Алып құзғынның қуатынан титімдей бұлбұлдың үні күшті.

***

Өзгетілді әр қандас - генеалогиялық байтеректен үзіліп түскен бір жапырақ.

***

Қарыз - қара Жермен өлшенеді.

Парыз - Аспанмен.

***

Пенделік махаббат - іңкәрліктің елесі ғана.

Іңкәрлік - періштелік жұпарнұрлы махаббат.

***

Адамның Ойы - онға, Санасы санға бөліне жасампаздық көрсете алады. Пенде - бір Ойының өзіне де ие бола алмай жатады, көбінесе. Неткен сорлылық десеңізші!

***

Күн нұры да бойлай алмайтын қайғы түбіне үміт сәулесі еркін жетеді.

***

Тоқ айдаһардан аш кесіртке қауіпті.

***

Сорың - Бастағы Бағыңның тыңайтқышы.

***

Өз Тілін қорлаған ұлтты да өз Тілінің Кійесі атады!

***

Күнді танымаған - дымды танымаған.

***

Түнді шашынан еркелете сипай білетіндер ғана шын Айды табады, көреді.

***

Күн көзінен тозақ нұры да төгіліп тұр...

***

Күйіктен өртеніп кеткен күрескер сүйегінің күлі де сөйлеп жатады.

***

Көздің кірі - көлегей.

Дүниені анық көрем десең, бір сәт жылап ал.

***

Әке-шешеңді қастерлегенің де - жалған, - Ұлтыңды, Ата Тіліңді сүймесең!

***

Ұйқас - Өлең қолындағы кісен. Шебер ақын оны жеңсеге я білезікке айналдыра алады.

***

Көсегелі миымыздан бастап, көтеннен түсетін "қиымызға" дейін, бәрі шоу болып кетті!

***

Адамның әр Ойы - парасатты нажағай... Дұрыс ойлап, дұрыс сөйлей білейік.

***

Адам жалғыз емес. Ол - "Сайтан мен Періштенің" біртұтастығы. Ойлану процесі - сол "екеуінің диалогы".

***

Көркем сөйлейтіндер аз емес.

Көркем ойлайтындар көп емес.

***

Маусымдар айналымы - эволюцияның Күнге бағытталған мерзімдік спиралі.

***

Күн де өзінің көлеңкесін көрер еді, егер оған Тәңірінің жарығы түссе.

***

Әділет - адам ауызы сөйлеуге ғана қажет болатын заманда орнайды.

***

Оңбаған елдің орманы да назалы.