Алматыда көрнекті жазушы, белгілі редактор, журналист Еркінбай Әкімқұловқа ескерткіш тақта орнатылды, деп хабарлайды madeniportal.kz.

Еркінбай Әкімқұлов есімі әдебиетті құлай сүйетін көзі қарақты оқырманға жақсы таныс. Сол себепті салтанатты шараға жазушының ұрпағы, зиялы қауым өкілдері, бір топ журналистер жиналды.

Еркінбай Әкімқұлов 52 жыл отасқан жары Гүлнәрмен Құралай, Құрман, Нұрлан есімді ұл-қыздар тәрбиелеп өсірді. Еркінбай Әкімқұловтың бүгінде 4 немере, 3 шөбересі бар. Жазушының перзенттері, немерелері, оның көзін көрген зиялы қауым өкілдері оған ескерткіш тақта орнатты. Салтанатты іс-шарада Жазушылар одағының төрағасы Мереке Құлкенов сөз сөйледі.

Іс-шарада Алматы қалалық Мәдениет басқармасының басшысы Ғани Майлыбаев та бой көрсетті.

Еркінбай Әкімқұлов көп жылын Шәмші шығармашылығын зерттеуге арнаған. Оның қазақ арасында "Ән-аға" атанған композитор Шәмші Қалдаяқовты асқақтата жазған шығармалары оқырманның жүрегіне төте жол тапты. Ол “Шәмші Қалдаяқов - ән патшасы”, “Өзбекәлі Жәнібеков” сынды шығармалардың авторы. 

М.О. Әуезов атындағы Әдебиет және Өнер институтының басшысы, ҚР Еңбек сіңірген қайраткері, филология ғылымдарының докторы Кенжехан Ісләмжанұлы Матыжанов да салтанатты жиында сөз сөйлеп, Еркінбай Әкімқұловты еске алды.

Көрнекті жазушыға арналған ескерткіш тақтада “Бұл үйде 1994-2019 жылдары көрнекті жазушы, журналист, Қазақстан Жазушылар және журналистер одағының мүшесі Еркінбай Әкімқұлов тұрған” деп жазылған.

Еркінбай Әкімқұлов 1937 жылы 4 қыркүйекте Оңтүстік Қазақстан облысы, Отырар ауданы, Балтакөл ауылында туған. 1959 жылы Қазақ Мемлекеттік университетін бітірген. Кейін республикалық “Лениншіл жас” газетінде әдеби қызметкер, бөлім меңгерушісі, Алматы қалалық партия комитетінде нұсқаушы, Қазақ радиосында аға редактор болып жұмыс атқанған. Көрнекті жазушы, журналист 2019 жылы қаза болды.