Біз Түркияның Ұлы Ұлттық Жиналысымен ынтымақтастықты дамытуға және заңнамалық бағытта тәжірибе алмасуға мүдделіміз. Екі елдің Парламенттерінде жұмыс істейтін «Қазақстан-Түркия» парламентаралық достық топтарының әлеуетін одан әрі дамытудың маңызы зор. Түркітілдес елдердің мәдени, экономикалық және гуманитарлық саладағы байланысын нығайтуға Түркі мемлекеттерінің Парламенттік Ассамблеясы да үлкен үлес қосып отыр. Сенат депутаттары ТүркПА комиссияларының жұмысына және оның шеңберінде өтетін басқа да іс-шараларға белсенді қатысып келеді, – деді Мәулен Әшімбаев.

Түркі мемлекеттері ұйымының 10-шы саммитінде Қазақстан Президенті Қасым-Жомарт Кемелұлы Тоқаев атап өткендей, біздің елдің Ұйымға төрағалығы «TURKTIME!» ұранымен өтеді. Бұл тұжырымдамада бірінші кезектегі басымдықтар белгіленген. Өзара сенім мен тарихи тамырға табан тіреген бірлігімізді сақтау және нығайту – біздің ортақ мақсатымыз. Астана саммиті елдеріміз арасындағы саяси, экономикалық және мәдени ықпалдастықты жаңа деңгейге көтеруге септігін тигізді деп есептейміз, – деген Мәулен Әшімбаев Қазақстан Парламентінің Сенаты екі елдің қарым-қатынасын одан әрі нығайту жолындағы тиісті жұмысты жалғастыра беретінін атап өтті.