Шаттық Батан. Оның әр суреті өлең

«Маки» инсталляция 5х6х4 м, 2012Өнерді бағалайтын жұрт Сырлыбектің сырлы әлемін, жазған картиналарын енді бағалай бастады. Өте терең, ізденімпаз суретші. Үнемі жанынан жаңа дүние жаратқысы кеп аласұрып жүреді өзі. Сырлыбектің әр шығармасы, инсталляциясы болсын, перфоменс, графикалары болсын ой тастап отырады. Осындай жаңалыққа жаны құмар, ізденімпаз суретшілер біздің қоғамға көп керек. Қанша жаңашыл, заманауи дүниелерді жасап жүрсе де ұлттық болмыстан ешқашан ажырамайды. Болашағынан үміт күттіретін үлкен суретші. Жаңашыл өнерпаздарымызды бөтенсіп қабылдамағанмен, ол үрдіс біздің қанымызда бар нәрсе. Уақыттың тілімен, ұрпақтың қолымен жасалып жатыр қазір. Ұлттық детальді қосуды ұмытпайтын заманауи суретші деп атасақ та болады Сырлыбекті. Экспериментшіл. Экспериментке еріккеннен бармайды. Жан-дүниесіне үңіліп, іштегі әлдебір тылсымдарды ашуға тырысады. Оның әр суреті өлең. Арғы мен бергіні жалғап жатады жазғаны. Үзіліп қалмайды. Өзінің немен айналысып жүргенін, келешекке қандай қадам жасайтынын анықтап алған қаламгер. Сырлыбек сүйген саласын, Өзі берген өнердің қалтарыс-бұлтарысын, арғы-бергісін әбден зерттеп алған. Жалпы әлемдік сурет өнерінің дамуын, немен тыныстап жатқанын жақсы біледі. Көздеген мақсаты жоғары да биік суретші.

madeniportal.kz