Алматыда 2300 жыл бұрынғы сақ қорғанынан ерекше алтын қазына табылды

Алматыда археологтар 2300 жылдан астам уақыт бұрынғы сақ дәуіріне жататын қорғаннан құнды тарихи жәдігерлер тапты. Олардың арасында алтыннан құйылған аю мүсіні ерекше назар аударды, деп хабарлайды MadeniPortal.kz.

Алматы қаласы әкімдігінің қолдауымен Алматы қаласы музейлер бірлестігі Наурызбай ауданындағы Қарағайлы қорымында археологиялық қазба жұмыстарын жүргізген. Мамандар апатты жағдайда тұрған, ерте темір дәуіріне жататын сақ қорғанын зерттеген.

Қазба барысында біздің заманымызға дейінгі IV–III ғасырларға тиесілі алтын бұйымдар, қыш ыдыстардың сынықтары мен адам сүйектері табылды. Археологтардың алдын ала болжамынша, қорғанда төрт ересек адам мен үш бала жерленген болуы мүмкін.

Ең құнды олжа – алтыннан құйылған аю бейнесіндегі шағын мүсін. Мамандардың пайымдауынша, бұл әшекей ежелгі сақтардың бас киімін безендіруге арналған. Бұйымдағы арнайы ойықтар оның бас киімге бекітілгенін аңғартады.

Мұндай алтын әшекейлер сақ дәуіріндегі киім үлгілеріне тән болған. Мәселен, әйгілі «Алтын адамның» бас киімінен арқар бейнесіндегі алтын бұйым табылған. Ал 2014 жылы Көк-Қайнар қорымынан барыс бейнесіндегі шағын мүсін анықталған.

Археологтар жаңа олжаның ежелгі сақтардың зергерлік өнерін, дүниетанымы мен киім мәдениетін зерттеуде маңызды дерек болатынын атап өтеді.

Қазіргі уақытта табылған жәдігерлерді ғылыми тұрғыдан зерттеу жұмыстары жалғасады. Зерттеу толық аяқталған соң ең құнды бұйымдарды Алматы музейінің экспозициясына қойып, көпшілікке таныстыру жоспарланып отыр.

Осылайша, Алматы аумағынан табылған жаңа жәдігерлер сақ өркениетінің бай тарихи мұрасын толықтыра түспек.