Қазақстанда халықаралық жүк тасымалына электрондық жүкқұжат енгізіледі

Қазақстанда халықаралық автомобиль тасымалында қағаз жүкқұжаттардың орнына электрондық құжаттарды қолдануға құқықтық мүмкіндік жасалады. Құрылтай халықаралық жүк тасымалын цифрландыруға бағытталған қосымша хаттаманы ратификациялады, деп хабарлайды MadenipPortal.kz. 

Құрылтайдың баспасөз қызметінің мәліметінше, депутаттар «Жүктерді халықаралық жолмен тасымалдау шарты туралы конвенцияға электрондық жүкқұжатқа қатысты қосымша хаттаманы» ратификациялау туралы заңды қабылдады. Аталған құжат 2008 жылғы 20 ақпанда Женева қаласында қабылданған. Оның негізгі мақсаты – халықаралық жүк тасымалында құжаттарды рәсімдеу тәртібін жеңілдетіп, электрондық құжат айналымын дамыту.

Жаңа тәртіп бойынша жүкқұжаттарды электрондық форматта рәсімдеуге мүмкіндік беріледі. Бұл тасымалдаушыларға қажетті мәліметтерді цифрлық жүйелер арқылы тіркеуге, өңдеуге және пайдалануға жол ашады. Құрылтай мәліметінше, мұндай өзгерістер отандық және шетелдік тасымалдаушылардың жұмыс шарттарын біріздендіруге бағытталған.

Сонымен қатар электрондық жүкқұжаттарды пайдалану жүк тасымалы кезіндегі бақылау рәсімдеріне жұмсалатын уақытты қысқартуға мүмкіндік береді. Құжаттарды басып шығару, өңдеу және мұрағаттауға кететін шығындар да азаяды деп күтілуде. Заңнамалық өзгерістер Қазақстанның транзиттік әлеуетін арттыруға да ықпал етпек. Атап айтқанда, Еуразия аумағында қалыптасып жатқан халықаралық көлік дәліздері арқылы жүк тасымалдауды жеңілдету және әртүрлі көлік түрлерінің өзара байланысын жақсарту көзделген.

Бұдан бөлек, электрондық құжат айналымына көшу отандық автокөлік кәсіпорындарының бәсекеге қабілеттілігін арттыруға мүмкіндік береді.

Айта кетейік, қосымша хаттаманы ратификациялау электрондық жүкқұжаттарды қолдануға құқықтық негіз қалыптастырады. Бұл барлық қағаз құжат бірден жойылады дегенді білдірмейді. Электрондық жүйені іс жүзінде қолдану тиісті рәсімдер мен техникалық дайындыққа байланысты жүзеге асырылады.