Қазақстанда жаңа теміржол ашылып, маңызды тас жол кеңейтіледі – Тоқаев

Президент Қасым-Жомарт Тоқаев Қазақстан халқына Жолдауында көлік-логистика инфрақұрылымын дамытуға қатысты бірқатар маңызды тапсырма берді. Мемлекет басшысы жаңа теміржол желісінің іске қосылатынын және бірнеше ірі жол жобасының жүзеге асырылатынын мәлімдеді, деп хабарлайды MadeniPortal.kz Ақордаға сілтеме жасап.

Президенттің айтуынша, дамыған көлік-логистика жүйесі ел экономикасының өсуіне және Қазақстанның халықаралық транзиттік әлеуетін арттыруға тікелей ықпал етеді.

Мемлекет басшысы келесі жылы «Бақты – Аягөз» теміржол желісі іске қосылатынын айтты. Жаңа бағыт Қытаймен арадағы жүк өткізу мүмкіндігін жылына 20 миллион тоннаға арттырады.

Сонымен қатар биыл тамызда «Арал – Каспий» күре жолының құрылысы басталған. Бұл жоба Транскаспий дәлізінің ұзындығын шамамен 1 мың шақырымға қысқартып, жүк жеткізу мерзімін үш күнге дейін азайтуға мүмкіндік береді.

Президент еліміздің солтүстік өңірлеріндегі жол инфрақұрылымына да ерекше назар аударды.

Осыған байланысты Тоқаев «Көкшетау – Петропавл» тас жолын кеңейту жұмыстарын бастауды тапсырды.

Бұдан бөлек, Президент отандық жүк тасымалдаушыларды қолдау қажеттігін атап өтті. Оның айтуынша, Қазақстан арқылы өтетін автомобиль транзитінің жартысынан астамы шетелдік тасымалдаушылардың үлесінде.

Мемлекет басшысы Үкіметке көлік және логистика саласындағы барлық жобаның сапалы әрі белгіленген мерзімде орындалуын қатаң бақылауды тапсырды.