Қазақстандық кітапханашылар Пусандағы IFLA WLIC 2026 халықаралық конгресіне қатысты

2026 жылғы 10–13 тамыз аралығында Корея Республикасының Пусан қаласында Халықаралық кітапханалық қауымдастықтар мен мекемелер федерациясының (IFLA) 90-шы Дүниежүзілік кітапханалық-ақпараттық конгресі – IFLA WLIC 2026 өтуде, деп хабарлады  MadeniPortal.kz.

IFLA WLIC – әлемнің түрлі елдерінен кітапхана және ақпарат саласының мамандарын, ұлттық және ірі ғылыми кітапханалардың өкілдерін, кәсіби қауымдастықтарды, зерттеушілер мен сарапшыларды біріктіретін халықаралық кәсіби алаңдардың бірі. Конгресс кітапхана ісінің қазіргі жағдайын саралап, саланың болашақ даму бағыттарын талқылауға, жаңа тәжірибелер мен кәсіби бастамаларды таныстыруға мүмкіндік береді.

Биылғы конгрестің негізгі тақырыбы – «Libraries Powering Transformation» («Кітапханалар – трансформация қозғаушысы»). Тақырып қазіргі қоғамдағы кітапханалардың дәстүрлі қызмет аясынан кеңейіп, білім мен ақпаратқа қолжетімділікті қамтамасыз ететін, цифрлық трансформацияға ықпал ететін, мәдени мұраны сақтайтын және қоғамның зияткерлік әлеуетін дамытуға үлес қосатын маңызды институт ретіндегі рөлін айқындайды.

Қазақстандық делегацияның қатысуы

Қазақстан кітапханалар Одағы IFLA-ның ресми мүшесі ретінде халықаралық кәсіби алаңға белсенді қатысуда. IFLA WLIC 2026 конгресіне Қазақстаннан 40-қа жуық кітапхана саласының маманы қатысып, ТМД елдері арасында ең үлкен делегацияны құрап отыр.

Қазақстандық делегация құрамындағы мамандар конгрестің пленарлық отырыстарына, кәсіби секцияларына, панельдік пікірталастарына, арнайы сессиялары мен тәжірибе алмасу алаңдарына қатысуда. Бұл отандық кітапхана мамандарына әлемнің түрлі елдеріндегі әріптестерімен тікелей кәсіби байланыс орнатып, кітапхана саласындағы жаңа бастамалар мен халықаралық тәжірибелерді зерделеуге мүмкіндік береді.

Кітапхана ісінің өзекті бағыттары талқылануда

IFLA WLIC 2026 ғылыми-кәсіби бағдарламасы қазіргі кітапхана-ақпарат саласының даму бағытын айқындайтын маңызды мәселелерді қамтиды.

Конгресс аясында ұлттық кітапханалар мен ұлттық библиографияны дамыту, ұлттық библиографиялық ресурстарды қалыптастыру мен олардың халықаралық ақпараттық кеңістікпен ықпалдастығын арттыру мәселелеріне ерекше назар аударылуда.

Сонымен қатар халықаралық библиографиялық және метадеректер стандарттарын жетілдіру, кітапханалық деректердің өзара үйлесімділігін қамтамасыз ету, каталогтаудың заманауи модельдері мен цифрлық ресурстарды сипаттаудың жаңа тәсілдері кәсіби талқылаулардың маңызды бағыттарының бірі болып отыр.

Бағдарламада цифрлық трансформация, ақпараттық қауіпсіздік және жасанды интеллект технологияларын кітапхана қызметіне енгізу мәселелері де кеңінен қарастырылуда. Жасанды интеллект құралдарын ақпарат іздеу, библиографиялық деректерді өңдеу, электрондық ресурстарды жүйелеу, пайдаланушыларға қызмет көрсету және кітапхана процестерін автоматтандыру бағыттарында пайдалану мүмкіндіктері талқылануда.

Сондай-ақ кітапханалардың цифрлық ортадағы рөлі, ақпаратқа тең қолжетімділік, кәсіби құзыреттерді дамыту, мәдени және деректі мұраны сақтау, сирек кітаптар мен қолжазбаларды қорғау, кітапханалардың қоғаммен өзара байланысын күшейту мәселелері де халықаралық кәсіби қауымдастық назарындағы негізгі тақырыптардың қатарында.

Халықаралық тәжірибе – отандық кітапхана ісін дамытуға мүмкіндік

Қазақстандық делегацияның IFLA WLIC 2026 жұмысына қатысуы отандық кітапхана саласы үшін маңызды кәсіби тәжірибе болып табылады. Конгресс барысында әлемдік кітапхана ісіндегі жаңа үрдістерді зерделеу, заманауи технологиялық шешімдермен танысу, халықаралық стандарттарды қолдану тәжірибесін қарастыру және оларды Қазақстан кітапханаларының қызметіне бейімдеу мүмкіндігі қалыптасады.

Халықаралық кәсіби алаңдағы тәжірибе алмасу кітапханалардың цифрлық инфрақұрылымын жетілдіруге, электрондық ресурстарды дамытуға, библиографиялық қызметті жаңғыртуға, пайдаланушыларға ұсынылатын қызметтердің сапасын арттыруға және кітапхана мамандарының кәсіби құзыреттерін күшейтуге ықпал етеді.

Сонымен бірге конгресс қазақстандық кітапханашылар үшін халықаралық әріптестік аясын кеңейтіп, шетелдік кітапханалармен, кәсіби ұйымдармен және сарапшылармен жаңа байланыстар орнатуға мүмкіндік беретін маңызды алаң болып отыр.

Қазақстанның халықаралық кітапхана кеңістігіндегі өкілдігі

Қазақстан кітапханалар Одағының IFLA-ға мүшелігі еліміздің халықаралық кітапхана қауымдастығындағы кәсіби өкілдігін нығайтуға мүмкіндік береді. Бұл Қазақстан кітапханаларының халықаралық бастамаларға қатысуына, әлемдік тәжірибелерді зерделеуіне және отандық кітапхана саласының жетістіктерін халықаралық кәсіби ортада таныстыруына жол ашады.

IFLA аясындағы кәсіби ынтымақтастық кітапхана ісін халықаралық стандарттармен сабақтастыра дамытуға, заманауи технологияларды енгізуге, кітапханалардың білім, ғылым және мәдениет кеңістігіндегі рөлін арттыруға ықпал етеді.

IFLA WLIC 2026 конгресіне қазақстандық мамандардың кең құрамда қатысуы – еліміздің кітапхана саласының халықаралық кәсіби кеңістікпен байланысын нығайтып, әлемдік тәжірибені отандық кітапхана ісінің дамуына тиімді пайдалануға бағытталған маңызды қадам.