Дәнеш Рақышевтың туғанына 100 жыл толуына арналған «Біздің жәрмеңке – ән ғұмыр» атты концерті өтті

ҚР Мәдениет және ақпарат министрлігінің қолдауымен Роза Бағланова атындағы «Қазақконцерт» мемлекеттік академиялық концерттік ұйымында көрнекті әнші, композитор, Қазақстанның Халық әртісі Дәнеш Рақышевтың туғанына 100 жыл толуына арналған «Біздің жәрмеңке – ән ғұмыр» атты концерті өтті, деп хабарлайды MadeniPortal.kz.

Кеш барысында ҚР Премьер-Министрінің орынбасары – Мәдениет және ақпарат министрі Аида Ғалымқызы Балаеваның құттықтау хаты оқылды. Құттықтауда Данеш Рақышевтің қазақ өнерінің дамуы мен музыкалық мұраны кеңінен насихаттауға қосқан зор үлесі атап өтілді.

Концерттік бағдарламада Дәнеш Рақышевтың шығармашылығы кеңінен таныстырылып, оның қолтаңбасына айналған танымал туындылар шырқалды. Атап айтқанда, «Жетісу қарқара», «Бақытым бол», «Бел жайлау»,  «Саясында алманың», «Жан-жақтағы бауырлар», «Ән салайын» және т.б. туындылар орындалды. Бағдарлама тек еске алу кеші емес, сонымен қатар ұлттық ән өнерінің даму жолын көрсететін үлкен мәдени оқиғаға айналды. Әрбір орындалған ән көрерменді өткен дәуірмен байланыстырып, қазақ музыкасының шынайы болмысын сезіндірді.

Іс-шараға дәстүрлі өнерді насихаттап жүрген талантты орындаушылар, «Astana sazy» Қазақ мемлекеттік фольклорлық ансамблі мен «Халық қазынасы» ұлттық өнер орталығының әртістері қатысты.