8 жастағы баланың денесі тоңазытқыштан табылды: анасы, әкесі мен әжесі сот алдында

АҚШ-тың Калифорния штатындағы Комптон сотында сегіз жастағы Исайя Х.-ның өліміне қатысты іс бойынша алдын ала тыңдау басталды. Баланың анасы, әкесі және әжесіне кісі өлтіру, азаптау және баланың өліміне әкеп соққан қатыгездік әрекеттері бойынша айып тағылған, деп хабарлады MadeniPortal.kz. 

Тергеу дерегінше, Исайя 2025 жылдың қазан айында алған жарақаттарынан қайтыс болған. Оның денесі төрт күннен кейін Линвуд қаласындағы пәтерден мұз салынған тоңазытқыш-контейнер ішінен табылған.

Лос-Анджелес округі прокуратурасының мәліметінше, бала ұзақ уақыт бойы анасы Дестини Лаки Харрисон, әкесі Дэниел Альберто Монсон және әжесі Ана Каркамо Зарсено тарапынан зорлық-зомбылық көрген деген болжам бар.

Алдын ала тыңдаудың алғашқы күні баланың әкесінің танысы куәлік берді. Оның айтуынша, оны үйге Исайяның ауырып қалғанын айтып шақырған. Кейін куәгер баланың соққыға жығылғанын білген. Оның сөзінше, Исайя құлап, басын соққаннан кейін туыстары 911 қызметіне хабарласудан қорқып, медициналық көмекке жүгінбеген.

Куәгердің мәлімдеуінше, кейін әжесі оған Исайяның қайтыс болғанын айтқан. Сондай-ақ ол баланың денесі тағамдық пленкаға оралғанын және оны сақтау үшін тоңазытқыш сатып алынғанын жеткізген. Куәгер отбасы мүшелері одан мәйіттен құтылуға көмектесуді сұрағанын да мәлімдеді.

Сотта баланың қайтыс болар алдындағы жағдайы туралы да айтылды. Исайяның әпкесінің сөзінше, отбасы оның салмағына алаңдап, тамақтануын шектеген. Баланың денесі табылған кезде оның салмағы шамамен 29,5 келі болған.

Үш айыпталушы да кісі өлтіру, азаптау және баланың өліміне әкелген қатыгездік әрекеттері бойынша жауапқа тартылып отыр. Әкесі мен әжесіне бұған қоса баланың өлімінен кейін қылмысты жасыруға қатысты айып тағылған.

Егер тағылған айыптар бойынша кінәлі деп танылса, олардың әрқайсысына 32 жылдан өмір бойына дейін бас бостандығынан айыру жазасы тағайындалуы мүмкін.