Франциядағы жаппай наразылық: 500-ге жуық мектепте сабақ тоқтайды

Францияда оқушылардың жалғасып жатқан наразылық акцияларына байланысты 5 қазанда 400-ден 500-ге дейін мектепте сабақ толық немесе ішінара тоқтатылады, деп хабарлады MadeniPortal.kz. 

Францияның білім министрі Эдуар Жеффренің айтуынша, оқушылар мен мектеп қызметкерлерінің қауіпсіздігін қамтамасыз ету мүмкін болмаған білім ошақтары уақытша жабылады. Жағдай тұрақталған сайын сабақтарды кезең-кезеңімен қайта бастау жоспарланып отыр.

Наразылық басталғалы 24 білім беру мекемесі тоналған немесе өртке оранған. Сонымен қатар тәртіпсіздіктер кезінде білім беру саласының кемінде 78 қызметкері зардап шеккен.

Министр бұл көрсеткішті бұрын-соңды болмаған жағдай деп бағалады. Оның сөзінше, кейбір мектеп қызметкерлері ұлттық білім беру жүйесінде жұмыс істегені үшін әдейі шабуыл нысанасына айналған.

Билік өкілдерінің мәліметінше, бастапқыда жоғары сынып оқушыларының қозғалысы ретінде басталған наразылықтарды радикалды солшыл саяси топтар өз мақсаттарына пайдалануға тырысып жатыр.

Елдегі жағдай білім беру мекемелерінен тыс жерлерде де күрделі күйінде қалып отыр. Ішкі істер министрі Лоран Нуньестің мәліметінше, наразылық басталғалы 5 мыңнан астам адам ұсталған. Олардың басым бөлігі – жасөспірімдер.

Тек жұма күні полиция 1747 адамды ұстаған. Наразылық акциялары 735 мектепті қамтыса, 158 білім беру мекемесінің маңында көшедегі зорлық-зомбылық деректері тіркелген.

Франция билігі мектептердегі қауіпсіздік шараларын күшейтіп, жағдай тұрақталған сайын білім беру ұйымдарын қалыпты жұмыс режиміне қайтаруды жоспарлап отыр.