Ашық жалын мен улы түтін: Алматылық дәмханалар тұрғындар өміріне қауіп төндіруде

Кәсіпкерлік пе, әлде баяу әсер ететін бомба ма? Алматының кейбір қоғамдық тамақтану орындары санитарлық нормаларды ғана емес, қарапайым қауіпсіздік ережелерін өрескел бұзып отыр. Тұрғын үйлерге жапсарлас салынған мангалдар, өрт қауіпсіздігін елемеу және биологиялық қатер – Жетісу ауданындағы тексеріс осындай қорқынышты деректерді ашты. Кәуаптың иісіне мастанған кәсіпкерлер халықтың өмірімен ойнауын қашан доғарады?

Тұрғын үй іргесіндегі «оқ-дәрі»

Қалалық ортадағы қауіпсіздік – басты басымдық. Алайда, Жетісу ауданындағы жағдай бұл қағиданың аяққа тапталғанын көрсетті. Тұрғындардың шағымынан соң жүргізілген тексеріс барысында Серіков көшесі, 41 мекенжайындағы «Алтын қазан» кафесі («Құлагер» ЖШС) нағыз қауіп ошағына айналғаны белгілі болды.
        Мұнда кәуап пісіретін мангал көпқабатты тұрғын үйге тікелей жапсарлас салынған. Бұл – өрт қауіпсіздігінің ең дөрекі бұзылуы.
        Қауіп неде? Қатты отынмен (көмір) жағылатын ашық оттан ұшқан бір ұшқын тұтас үйді жалынға орауға қауқарлы. Жел тұрғанда немесе май қызғанда, мұндай нысандар техногендік апаттың эпицентріне айналуы мүмкін.
        Тексеруші органдардың ескертуіне және 314 560 теңге айыппұлға қарамастан, нысан иесі тұрғындардың қауіпсіздігіне немқұрайлы қарап, жұмысын жалғастыра берген. Тек соттың араласуы мен қатаң тыйым салу туралы шешімінен кейін ғана, адам өміріне төнген қауіптің алды алынды. Жалпы, бұл нысанға қауіпсіздік талаптарын орындамағаны үшін бірнеше мәрте айыппұл салынып, іс сотқа дейін жетті.

Биологиялық және химиялық қатер

Қауіпсіздік ұғымы тек өртпен шектелмейді. Бұл – біз жұтатын ауа мен тұтынатын тағамның тазалығы. Назарбаев даңғылы, 28А мекенжайындағы «Аяна» ЖК нысанындағы жағдайды биологиялық қауіп деп бағалауға толық негіз бар.
        Тексеріс кезінде анықталған сұмдықтар:   
       Улы түтін: Мұржасы мен сүзгісі дұрыс орнатылмаған мангалдан шыққан қою түтін – химиялық уланудың көзі. Бұл маңайдағы тұрғындардың тыныс алу жүйесіне тікелей шабуыл.
        Эпидемиологиялық қауіп: Нысан ішінде өріп жүрген жәндіктер мен кеміргіштерге қарсы шаралардың (дератизация) жоқтығы – жұқпалы аурулардың таралу қаупін тудырады.
        Көлеңкелі бизнес: Нысанның жұмыс істейтіні туралы хабарламаның болмауы – мемлекеттік бақылаудан тыс қалуға ұмтылыс.
        Бұл нысан иесіне де алғашында 68 810 теңге, кейін талаптарды орындамағаны үшін 393 200 теңге айыппұл салынды.    
       

«Нөлдік төзімділік»: Тәртіп орнату

Қала билігі мен құқық қорғау органдары мұндай бассыздықтарға «нөлдік төзімділік» танытуда. Алматы қаласы Экология және қоршаған орта басқармасы мен Полиция департаменті бірігіп, қауіпті нысандарды анықтау бойынша 12 жоспардан тыс рейд жүргізді.   
        Нәтижесінде, халықтың қауіпсіздігіне нұқсан келтіргені үшін 1 887 360 теңге көлемінде әкімшілік шара қолданылды. Екі бірдей ірі нысанның ісі сотқа өтіп, жұмысына тосқауыл қойылды.
     «Eco Almaty» мамандары ескертеді: қалада қатты отын жағатын мангалдарды пайдалануға тыйым салынған. Газ жабдықтарына көшу және арнайы сүзгілер орнату – бұл кәсіпкердің қалауы емес, қала қауіпсіздігінің бұлжымас талабы.
       Қоғамдық тамақтану орындары – адамдардың демалатын жері, қауіп-қатер аймағы болмауы тиіс. «Кәсіпкерлікті қолдаймыз» деген ұран заңсыздық пен қауіпсіздік ережелерін бұзуға берілген индульгенция емес.
     Жетісу ауданындағы бұл оқиғалар – қаламыздағы басқа да дәмхана иелеріне қатаң ескерту. Адам өмірі мен денсаулығына қауіп төндіру – қылмыс. Тұрғындар да өз қауіпсіздігі үшін қырағы болып, күдікті жағдайларды көргенде құзырлы органдарға дер кезінде хабарлауы тиіс.

MADENIPORTAL.KZ шолушысы. 
         Дереккөз: Алматы қаласының Санитариялық-эпидемиологиялық бақылау және Экология басқармалары