«Үйімді сатып, 100 миллион қарызға баттым»: Айгүл Иманбаева өміріндегі ауыр кезеңді жасырмады

Қазақстандық танымал әнші Айгүл Иманбаева өміріндегі ең қиын кезеңдердің бірі туралы ашық айтты. Өнер иесінің сөзінше, ол баспанасын сатып, миллиондаған теңге қарызға батқан. Әнші басындағы қиындықтарды өзіне жасалған сиқырмен байланыстыратынын да жасырмады, деп хабарлады MadeniPortal.kz.

Айгүл Иманбаева соңғы бір жыл бойы күрделі жағдайды бастан өткеріп жүргенін жеткізді. Оның айтуынша, қаржылық қиындықтар салдарынан бар жиған-тергенінен айырылып қала жаздаған. Тіпті ел алдында абыройлы болып жүргеніне қарамастан, тығырыққа тірелгенін мойындады.

Өнер иесі осы кезеңде айналасынан түрлі күмәнді заттар табылғанын айтып, мұның бәрін өзіне жасалған сиқырмен байланыстыратынын жеткізді. Бұрын мұндай құбылыстарға мүлде сенбегенін де жасырмады.

Әншінің сөзінше, қуыршақ, сурет, жіп, қан мен топырақ секілді заттардың табылуы оның бұрынғы көзқарасын өзгерткен.

Сондай-ақ әнші өзіне айтылған сиқырдың «бес кезеңі» туралы әңгімеледі. Оның айтуынша, бұл түсінік бойынша адам алдымен ештеңеге зауқы соқпай, кейін қаржылық қиындықтарға тап болады. Одан соң отбасындағы жанжал көбейіп, денсаулығы мен психологиялық жағдайына қатысты мәселелер туындауы мүмкін деген сенім бар.

Дегенмен мұндай «бес кезеңнің» бар екені ғылыми тұрғыдан дәлелденбеген.

Айгүл Иманбаева басынан өткен жағдайға қарамастан, ешкімге өкпе-реніш сақтамайтынын айтты. Тіпті өзіне қастық жасады деп есептейтін адамды кешіргенін жеткізді.

Өнер иесі өзін осындай жағдайға душар етті деп санайтын адамның кім екенін жарияламады. Алайда болған оқиғалардан кейін өмірге деген көзқарасы өзгергенін аңғартты.