Павлодар облысының әкімі Президент тапсырмасын орындай ала ма?

Павлодар облысына қарасты Ақтоғай ауданының Ақтоғай, Қожамжар, Приреченск сияқты бірнеше ауылдың тұрғындары күн көріп отырған қорасындағы азын-аулақ малынан қол үзіп қалатын түрі бар. Себебі, онысыз да жыл санап тарайып келе жатқан жайылымдық жерлерінен айырылудың аз-ақ алдында тұр. Жергілікті жұртшылық «кәсіпкер, «Агро» шаруа қожалығының басшысы Игорь Головашов жайылымдық жерлерімізді басып алды» деп отыр. Ақтоғайлық ағайын осы мәселені айтып аудан әкімі Қаршыға Арыновқа, Павлодар облысының әкімі Әбілқайыр Сқақовқа да шағымданған. Бірақ, нәтижесіз. Аудан басшысы түгілі, облыс әкімінің И.Головашовқа пәлен дейтіндей қауқары жоқ сыңайлы. Себебі ол - бір ауданды ашса алақанында, жұмса жұдырығында ұстап отырған алпауыт бизнес иесі. 

Қожамжар ауылының тұрғыны Бөгембай Бектасұлының айтуынша, жергілікті жұртшылық жырақтан жайылым іздеп, тентіреп кететін түрі бар.

Павлодар облысында жайылымнан таршылық көріп отырған елді мекендер аз емес. Соның ішінде Павлодар ауданының бірнеше ауылын атауға болады. Онда ата кәсіппен айналысамын деген халыққа жер жетпей жатыр. Мысалы, Заря селолық округінің батысында орман шаруашылығы. Қалған аумақтарын аймаққа белгілі кәсіпкерлер, Ахметбековтер әулетінің жерлері алып жатыр. Яғни, Заря, Бірлік, Жертұмсұқ сияқты бірнеше елді мекен суармалы алқаптардың қоршауында қалған. 

Ауыл азаматтары мал басы жыл санап қысқарып келе жатқанын айтады. Себебі кәсіптің бұл түрімен айналысу тиімсіз болып барады. «Дұрыс мал бағу дегенді ұмытқалы қашан. Малдарды серуенге шығарғандай боламыз. Бір табын мал қырға бір ізбен шығып, бір ізбен қайтып келеді. Жан-жақтағы егістік алқаптарына түсіп кетпес үшін айдай жөнелеміз»,- деп налиды ауылдықтар. 

Осылайша, жерге бай қазақтың жайылымға жарымай келе жатқан жайы бар. Осындайда «аспаннан киіз жауса да, кедейге ұлтарақ бұйырмайтыны» рас па дерсіз. Жйылымға зар, өрісі тар болған елдімекен тұрғындары кімнен көмек сұрарын білмей отыр. Мәселені оң шешуге Павлодар облысы басшылығының шамасы келмейді, дейді жұртшылық. Бар үміт- Мемлекет басшысының Жолдауда берген пәрменінде.

Павлодар облысының басшылығы бұл тапсырманы орындай алар ма екен?

Жомарт Жылкелдіұлы