Атақты айтыскер Әселхан Қалыбекова дүниеден өтті

Қаралы хабарды Шымкент қаласы әкімінің орынбасары Шыңғыс Мұқан Facebook парақшасында мәлім етті. 

Әселхан Қалыбекова 1950 жылы 22 сәуірде Түркістан облысы, Отырар ауданы, Шәуілдір ауылында дүниеге келген. Белгілі халық ақыны Ергөбек Құттыбайұлының ұрпағы. 

1970 жылдары аудандық мәдениет бөлімінде, аудандық газет редакциясында қызмет етті. 1971-91 жылдары аралығында аудандық ауа райы мекемесінде бақылаушы қызметін атқарған. 1981 – 1982 жылдары суырып салма айтыс ақындарының додасына қатыса бастады. 

Ұлттық өнерге қосқан үлесі мен сіңірген еңбегі үшін бірнеше марапатқа ие болған. 1989 жылы Қазақстан жазушылар одағының Жамбыл атындағы халықаралық сыйлығының тұңғыш лауреаты атанды. 1990 жылы Қазақ КСР Жоғарғы Кеңесінің 6 сәуіріндегі жарлығы бойынша «Қазақ КСРнің Халық ақыны» құрметті атағымен марапатталды. 2001 жылы «Қазақстан тәуелсіздігіне 10 жыл» медалімен, 2005 жылы Елбасының жарлығымен еліміздің жоғарғы мемлекеттік марапаты «Парасат орденімен» марапатталды. Отырар ауданының Құрметті азаматы құрметті атағымен және де көптеген медалдармен сыйлықтармен марапатталған.

"Мәдениет порталы" ақынның отбасына, туған-туыстары мен өнер сүйер қауымға қайғыра көңіл айтады. Апамыздың жатқан жері жайлы болсын.

madeniportal.kz