Мемлекет өзіңді қастерлеп сақтасын!..

АТА ЗАҢ ТУРАЛЫ ОДА

(Меңзеу)

Кішкентай кітапта жазылған барлығы–

Бүгінгі елімнің ертеңгі тағдыры.

Ел-жұртын басқарған басшылар бас алмай,

Ежектеп оқуға міндетті әр күні!

Оқуға міндетті - бәрі де құрметтеп,

Үлкен де, кіші де ұстаздай үлгі етпек.

Әкімдер әділдік жолынан аттаса,

Алдыңда тұруға тиісті дірдектеп...

Ата заң, ұлтымның арымен жазылған,

Ата заң, жұртымның жанымен жазылған.

Ата заң, мен үшін, елі үшін мерт болған,

Атамның қып-қызыл қанымен жазылған!

Ұлтымның кеудесін түрткілеп Ұлы үміт,

Тарихқа заманның көзімен үңіліп,

«Тәуелсіз еліме тәуелді болам!» деп,

Патшамыз Ант ішкен алдыңа жүгініп...

Азаттық күлкісі естіліп әр үйде,

Бостандық бесігін сыйладың сәбиге.

Дәрежем тең менің – дәулетті дәуменен, 

Несібем тең менің – НӘН қызбен, әрине...

Жылқының жалында, түйенің қомында,

Кеткен жоқ Қазақстан, жүр сара жолында.

Әлемнен ақырып әділдік сұрайтын,

Ата заң, сен барсың халықтың қолында...

Зұлымдық қақпасын Тыныштық қақпасын,

Халықтар достығын дұшпандар мақтасын.

...Мұсылман дәретсіз ұстамас Құрандай,

Мемлекет өзіңді қастерлеп сақтасын!..

Алмас Темірбай

ЗАҢ ДӘСТҮР

Ата заңымның анасы болған дәстүрім,

Ата салтында – ғажайып ғұрып, жақсы ырым.

Ата бабамның ақ отау, алтын бесігі –

Атамекенім! Алладан соңғы басты ұғым!

Шариятымды, ар-ұятымды шаң басып,

Шаңырақ қалды. Шежіре сырдан шал қашып.

Шала білетін ұлтымның ұлық тарихын,

Шалағайлар жүр ата дәстүрден алжасып.

Қасиет қалмай, береке болмай ісімде,

Қас дұшпан келіп қасықтап қанымды ішуде.

Қасымхандардың қасқа жолынан адасып,

Қасқырдай болып ұлиды- ау, үрей ішімде.

Есімнен қалған елді адастырмас ескі жол,

Есімдегі әлгі ән, «Елім- ай» еміс естілер.

Есіктен қарап қалмасын қайран қазағым,

Есілге қонған есіл ерлерім, есті бол!

Тәуелсіздіктің жолында кеше мың өлдік,

Тәубасын айтып Тәңірге бүгін жүрер жұрт.

Тәуекел етіп, жеті жұртымның қамын жеп,

Тәукедей, сірә, жасайтын кім бар бір ерлік?!

Залалы тимей заманды мынау кім күштер?

Заңғар таулардай бола алар ма екен «білгіштер»

Заманалардан қазақтың заңы – дәстүр ғой,

Заң бұзғандардың бәрі де, ендеше, қылмыскер.

Қалқаман Сарин

Азат елдің ар-намысы- Ата Заң

Еліне арналатын тілегі шын, 

Ей, ұлым – Отанымның түлегісің!

Іргесін туған елдің тіреп тұрған

Қадірін Ата Заңның білемісің?!

Ешкім де мін таға алмас елдігіме!

Дауласып жармаспайды белдігіме.

Бойында Ата Заңның өріліп тұр

Даламның кеңдігі де, теңдігі де!

Бағынған өз заңына жұмыр ғалам,

Сондықтан Күннен Жерім суынбаған.

Қоғамның сан саласын реттейтін

Әрбір заң Ата Заңнан туындаған.

Бастайтын болашаққа бақ кемені,

Осы жол халықтың да нақ сенері!

«Халқыма адалмын!» деп Ата Заңға

Елбасы қолын қойып Ант береді.

Болғанмен бұл Өмірде айлаң күшті,

Ел үшін кім тындырар қайран істі?!

Еліңнің дамуы мен дағдарысы,

Ол-дағы Ата Заңға байланысты!

Нұр шашқан жас ұрпақтың ұғымына,

Тікелей өсер еткен ғұмырына,

Айналды Ата Заңым мызғымайтын

Тәуелсіз мемлекеттің тұғырына!

Әр бабы, әр тармағы жойылмайды,

Шектеу де және тегін қойылмайды!

Келісім-шарт жасасқан барлық шет ел

Қазақтың Ата Заңын мойындайды!  

Өмірден әділдік пен бақ табатын,

Құқығым қорғалды деп шаттанатын,

Өзіңдей жас өркендер келеді өсіп

«Бұл біздің – Ата Заң» деп мақтанатын!  

Өркендеп өз қолына алған ісі,  

Биікке қазағымның самға, құсы!  

Халық боп қадір тұтып, қастерлеген  

Ата Заң – Азат елдің Ар-намысы!  

Айбатыр Сейтақ

***

Ақ ары – сенер мияты ,

Басынан нелер өтпеген.

Ұлт едік уыз-ұяты,

Уыстан шығып кетпеген.

Жуаны сөзге жығылып,

Дуалы сөзге тоқтаған.

Даланың заңын ұғынып

Бетімен кеткен жок бабам,

Ел едік кеше тәу етер.

Даланың ғана занына,

Тәукелер еткен тәуекел,

Алаң боп елдің қамына.

Айналып заңға көшелі,

Кеңіді бүгін арнасы.

Әз Тәуке жазған кешегі,

«Жеті жарғының» жалғасы.

Арайлы күнге жол аштың,

Аманат болып атадан.

Айбыны сенсің – Алаштың,

Арымдай асқақ Ата-заң!

Шаттықтың күйін шертейік,

Елміз ғой жұртпен тең күші.

Елбасы сүйген еңкейіп,

Елдіктің ерен белгісі.

Раббысын ғана растайтын,

Басымды ием мың рет.

Тура бір жолға бастайтын,

Құраннан соңғы құдірет!

Ақтолқын Күлекеева

madeniportal.kz