Сембіғали Смағұлов. Шешімі табылған композициялық шығарма

Бейнелеу өнеріндегі шешімі табылған композициялық шығарма көзі қарақты адамға бірден тірі организмге ұқсап тұрады. Поэзиядағы сияқты тіркестер, шалыстар, ритмдік-ритмдік емес ұйқастар, немесе жекпе-жек спорт ойынындағыдай: соққы – тойтарыс сияқты әдіс, айла меңгерілгендігін оқып, шеберлігіне сүйсініп рухани ләззат аласың. Қайталанбас саусақ бедері сияқты әр адамның әдіс -айласы да алуан -алуан. Кереметі де сонда жатыр. Композиция дегеніміз композициялық элементтерді белгілі кеңістікте тек қана жай орналастыра салу емес, сол элементтерді үйлесімді қарым қатынасқа түсіре алғанда ғана жоғарыда айтылған бір тұтас тірі организмге айналып, көркем шығарма деген лауазымға ие болады. Тура осы айтылған түсінікті әркім өз дария сезімімен игеріп, сара жолын ашады. Әдебиетте қаратпа сөйлем деген ұғым бар, ұқсас ұғымдар бейнелеу өнерінде де «контраст, акцент» сияқты түсінікпен астың тұздығы сияқты қолданылып, меңгеріледі. Осы айтып отырған ойымды аспаннан алмай, дарынды жас суретші Дәурен Бекназаровтың туындыларына қарап отырып, әр қимылын барлап (барлай алғаныма қуанып; музыкада құлақ, тыңдау даярлығы қажет болса, бұл жерде көздің көре білу қабілеті әбден қажет), әлде болса тығылып жатқан қабілетіне тамсанып, риза болғанымды айтамын. Бұл еңбектер Дәуреннің қысқа уақыттағы ішкі сезім жетегінде еркін жазылған кезеңдік табыстары. Бұл өте маңызды тәжірибе. Осы қаблетін дамытқан суретші кез келген форматтарды еркін игеретін, суырып салма фантазиялы әмбебап күйде жүретін, шектелмеген биік өнер иесі болады. Себебі мен Дәуреннің академиялық бағыттағы тамаша мүмкіншіліктерімен де таныспын. Дәурен еңбектерінде ойын көзге ұрған танадай жәйіп салмай, көрерменнің ынтығын қытықтап тақырыбын құпиялағысы келіп тұрады. Олда бір мәнер. Олда бір сыр. Ол да бір сара жолдың басы шығар...

madeniportal.kz