Зеленский АҚШ-ты соғысты аяқтау үшін Ресейге қысымды күшейтуге шақырды

Украина президенті Владимир Зеленский Ресей тек Украина территориясына ғана емес, халықаралық дипломатияның өзіне, яғни кең ауқымды соғысты аяқтауға бағытталған күш-жігерге де соққы беріп жатқанын айтты. Бұл туралы ол 29 наурызда, сенбі күні жарияланған бейнемәлімдемесінде мәлімдеді, деп хабарлады MADENIPORTAL.KZ.

Оның айтуынша, сенбіге қараған түні Ресей Қарулы Күштері Украина нысандарына 172 ұшқышсыз ұшақ пен зымыран атқан. Президент бұл шабуылдарды тек Украинаға қарсы әскери әрекет ретінде ғана емес, сонымен қатар әлемдік деңгейде бейбітшілікке қол жеткізуге бағытталған күш-жігерге тікелей соққы ретінде қарастыру қажет екенін атап өтті.

Зеленский Украина одақтастарынан, ең алдымен АҚШ пен Еуропа елдерінен тек жауап емес, Мәскеуге нақты қысым жасауға бағытталған батыл әрекеттер күтетінін айтты.

Сонымен қатар, Зеленский өз сөзінде АҚШ тарапынан шартсыз атысты тоқтату туралы ұсыныс ұзақ уақыт бойы қарастырылып жатқанын, бірақ Ресей тарапынан ешқандай ресми жауап алынбағанын еске салды.