Астанада 5-ші Дүниежүзілік көшпенділер ойындарының еріктілері салтанатты түрде марапатталды, деп хабарлайды madeniportal.kz Halyq Uni тілшісіне сілтеме жасап. 

8-13 қыркүйек аралығында елордада Дүниежүзілік көшпенділер ойындары – этникалық спорт түрлері бойынша ең ірі халықаралық жарыс өтті. Бас қалада ауқымды жарыстарды өткізуге үлес қосқан еріктілер марапатталды, деп мәлімдеді жергілікті әкімдік.

Жобаға Астананың жоғары және орта оқу орындарынан 1600 ерікті қатысты.

Ойын барысында еріктілер қатысушылар мен қонақтарға қолдау көрсетті: туристерге маршруттар ұсынды, спорт нысандарының аумағын шарлауға көмектесті, уақтылы көмек пен ақпараттандыруды қамтамасыз етті. Олардың жұмысының арқасында қонақтар өздерін жайлы әрі қауіпсіз сезінді.

«Ойындар жоғары деңгейде өтті. Барлық қонақ, спортшылар, қатысушылар мен туристер жайлылық пен ұйымшылдықты сезінді. Біз көптеген оң баға алдық, көбісі Көшпенділер ойындарын Олимпиадамен салыстырады. Бұл процесте, әрине, еріктілер маңызды және үлкен рөл атқарды. Бір жарым жыл бұрын біз еріктілерді іріктеу процесін бастадық, республиканың барлық жоғары оқу орны мен колледждерінен 12 мың студенттен 1600 адамды іріктеп алдық. Бұл еріктілер ойын барысында маңызды рөл атқарды. Олар әуежай мен вокзалдардан бастап спорт нысандарына дейін барлық нысанда жұмыс істеді. Бүгін біз 5-ші Дүниежүзілік көшпенділер ойындарының дирекциясымен, Туризм және спорт министрлігімен және қала әкімдігімен оларды атап өтуге шешім қабылдадық. Біз алғыс хаттарды тапсырып қана қоймай, елеулі еңбек үшін ризашылығымызды білдіреміз», – деді қалалық мәслихат төрағасы Еран Каналимов.

Еріктілердің айтуынша, ойындарға қатыса отырып, олар мол тәжірибе жинап, жаңа достар тауып, шетелдік туристермен қарым-қатынас жасау дағдысына ие болды.

Алғыс хаттарды салтанатты түрде тапсырумен қатар, еріктілер үшін концерттік бағдарлама ұсынылды.