Іс-шараның мақсаты - дене шынықтыру мен спортты кеңінен насихаттау, жастарды салауатты өмір салтына баулу, Қазақстан тарихындағы ұлы тұлғаларға тиесілі бірегей мәдени құндылықтар мен тарихи заттарды сақтап, оны кейінгі ұрпаққа дәріптеу. 

Мельниченко Юрий Васильевич - Қазақстанның 7 дүркін чемпионы, Азияның 2 дүркін чемпионы (1996, 1997), Азия ойындарының чемпионы (Хиросима, 1994), 57 келіге дейінгі салмақ дәрежесінде XXVI Олимпиада ойындарының чемпионы (Атланта, 1996), Әлем чемпионы (1994, 1997), Грек- рим күресінен ҚР Еңбек сіңірген спорт шебері (1994). 1996 жылы Қазақстан Республикасы Президентінің Жарлығымен «Парасат» орденімен марапатталды. 2004 жылы «Қазақстанның еңбек сіңірген қайраткері» құрметті атағын алды. 

Кездесу барысында грек-рим күресінен Олимпиада чемпионы, Қазақстан Республикасының Еңбек сіңірген спорт шебері Юрий Васильевич Мельниченко жеке құнды заттарын музей қорына салтанатты түрде табыстайды. 

Атап айтқанда, ҚР Ұлттық музейінің қоры спортшының VII Қысқы Азия ойындарының сертификаты және арнайы алтын медалімен толығады. Алдағы уақытта аталған заттар ҚР Ұлттық музейі залында экспозицияланады. Іс-шараға мемлекет және қоғам қайраткерлері, сондай-ақ спорт және мәдениет саласының өкілдері қатысады.

Өтетін орны: Қазақстан Республикасының Ұлттық музейі.

madeniportal.kz