Көрнекі сурет интернеттен ашық ақпарат көзінен алындыДәстүрлі энциклопедиялық анықтамаға жүгінсек, б...
Сәукеле (Деректі эссе)
Адамзат тарихында көптеген материалдық құндылық заман өте келе алғашқы функциясынан ажырап, басқа сипатқа ие болды. Оның ішінде адамзаттың күнделікті тұрмыс-тіршілігінде қолданған заттар да бар. Сондай бұйымның бірі – сәукеле. Тарихи деректерге қарағанда, сәукелені бұрын бай ақсүйек әйелдер ғана киген. Қазір сәукелені жаңа түскен келін беташар салтында дәстүрлі киім немесе сахналық киім ретінде қыз-келіншектер киеді. Алайда осынау аристократиялық баскиімнің тарихына үңілсек, небір қилы тағдырды бастан кешкенін көреміз.
Көмілген байлық
Патшалық Ресей тұсында қазақ жерінің территориясы қазіргіден кең болғаны белгілі. Қарға тамырлы қазақ алыс-жақын елдегі ағайынмен араластықты үзбей, туыстықты қуысып, қыз алысып, қыз берісіп тұрған. Қазіргі Ресей, Қытай, Моңғолия және Қазақстан елдерінің шекарасы түйіскен Алтай тауларын мекен еткен қазақтар арасында барыс-келіс үзілмеген. Сондай оқиғаның бірі – Моңғолияның Алтай-Бесбоғда тауының етегін жайлаған Өлеңбай деген бай ұлы Найынға Шығыс Қазақстан өңірі Қатонқарағай жерінде өмір сүрген атақты бай Достар қажының Зағи деген қызын айттырады. (Ол кезде қазіргі Ресей жеріне қарап кеткен Рахман арасаны арқылы ары-бері өтіп тұрыпты). Достар қажы қызын ұзатар кезде отыз күн ойын, қырық күн тойын жасап, жиырма атанға жасауын арттырады.
Ол кезде қазақтар арасында жөн-жоралғыда көбіне-көп күміс жүргені белгілі. «Алтынның жолы – ауыр жол» деп ырымдаған. Ұзатылған қыздың жасауына күміс табақ, күміс қасық секілді тұрмыстық заттарына дейін байлар күмістен жасататын болған. Достар байдың да қызы ұзатылған кезде осылай күміспен күптеліп, алтынмен апталыпты. Басына біркелкі күміспен әшекейленген сәукеле киген екен. Сол заманда байдың байлығы ұзатқан қызының басына кигізген сәукелесімен өлшеніпті.
Заман бір аунаған тұста кеңестік қысым күшейіп, байлардың мал-мүлкін кәмпескелей бастайды. Найын мен Зағи дүниелерінен баз кешіп, Алтайдың Қытай жағына көшеді. Көшерде Зағидың төркінінен келген алтын-күмісті екіге бөліп «заман түзелсе тауып алармыз, бір кәпірдің қолында кеткенше өз жерімізде қалсын» деп көміп кетеді. Бірақ жалшысы Хасен деген кедей байлықтың бір бөлігін иеленіп кетіпті деседі ұрпақтары (ел ішінде сол байлықты әлі де іздейтіндер бар көрінеді). Бұл жерде басқа байлық емес, бізге қызықтысы – Зағи апаның күміс сәукелесі еді.
Зағи апаның қызынан туған жиеншары Құндызбай, Жанатхан деген ұрпақтары қазір елорданың іргесіндегі Талапкер ауылында тұрады. Зағи апаның шөбересі Жанатқан апайда жуандығы саусаққа таяу күміс білезік және тұмары қалыпты. Ал күміс сәукеленің бұдан кейінгі тарихы бұлыңғыр.
Зағи келін болып түскеннен кейін жалғыз қайын сіңлісі Қадиша ұзатылып бара жатқанда күміс сәукелесін сыйлаған екен. Қадиша (Қалақ апа) Баян-Өлгейдің Алтай деген жеріне сопы Бабархан (Бабаш молда) Жолдыұлы деген кісіге ұзатылады. Ал Бабаш молда 1937 жылы жаппай қуғын-сүргін құрбаны болып, дүние-мүлкі талан-таражға түседі. Күміс сәукеленің осыдан кейінгі тағдырын ешкім білмейді.
Жалпы, сәукеле туралы қилы да қызықты дерек көп. Мәселен, сақтардың биік баскиімі болғаны көне грек тарихшыларының жазбаларынан белгілі. Есік қорғанынан табылған алтын адамның бас киімінің де сәукелеге ұқсастығы байқалады. Бұған қоса, қазақтың апайтөс даласынан табылған балбал тастардың арасында сәукеле секілді шошақ баскиім киген әйел бейнесі көптеп кездеседі.
«Сәукеле көбіне қызыл түсті матадан тігіледі, ақ киізден жасалады, ішінен киетін шаш басарлары болады. Сәукеле – қалыңмалдың құнын орап әкететін дүние. Шеберді таңдап, қолақысын беріп, айлап, жылдап арнайы тіктіреді. Оған халқымыз гауһар, жақұт тастарын, бар байлығын қадаған. Қазақтың «Жеті жастан жинасаң жетеді, алты жастан жинасаң асады» деуі бекер емес. Сәукеле басқа адамға берілмейді, егер қыз барған жерінде қайтыс болса, сәукеле төркініне қайтарылған», – дейді этнограф Сымбат Ахметова.
Ал этнограф Тәттігүл Ерсайынқызы: «Біздің жерімізге келген байырғы Томас Аткинсон, Джон Кэстл секілді саяхатшылардың кескіндемелеріне қараңызшы, қазақтың ұзатылатын қыздары сәукелемен бейнеленген. ХІХ ғасырда жарыққа шыққан «Народы России» атты этнографиялық альбомда да сәукеленің бірнеше суреті берілген. Сәукеленің музейлерде сақталған кезеңі ХІХ ғасырдан басталады. Бұл оған дейін қазақта сәукеле болмады деген сөз емес. Алайда ол кездегі сәукелелер сақталмаған», – дейді.
Тағы бір қызығы, француздардың эннон деген биік баскиімін ХVII-XVIII ғасырда ең байқуатты әйелдер киген. Баскиімнің артында қытай жібегінен вуаль болған. Жібек жолы арқылы қазақтың сәукелесі Еуропаға жетіп, сәнге айналған деген деректер кездеседі.
Ал әйгілі ақын, этнограф Мәшһүр Жүсіп Көпейұлы ХVІІІ ғасырда болған сәукеле туралы екі оқиғаны жазып қалдырыпты. Оның жазбасында сәукелені тіпті ер адам кигені жайлы жазылған.
Мәшһүр Жүсіп Көпейұлының дерегінше, Қуандықта Қорысбай деген асқан бай кісі ас беріп, Алашқа сауын айттырады. Сол асқа Шоң биді шақырады. Шоң би асқа алып барған ақыны Сақауға: «Алдымен мына Шондыжанға өлең айтып, басындағы тақиясын алып ки! Сонан соң бар да, Саржан төреге өлең айт, онан кейін Өтебай жындыға айт, басындағы сәукелесін сұра, қанша дүние берсе де алма. Егер сәукелесін бере қалса, етегіңе орап, алды-артыңа қарамай мұнда алып кел. Елі білсе, тартып алып қалар» деп батасын беріп жөнелтіпті. Сақау Саржан төреден кейін Өтебай жындыға барыпты. Бұл Өтебай жынды Алтай-тоқаның Тоқасынан. Көктің көліндегі емен баласынан шыққан сал екен. Әкесі Күшікбайға он екі мың жылқы біткен екен. Сол он екі мың жылқы мұны жындандырмай қалай тыныш қояды. Осы асқа киіп келуге өзіне арнап сәукеле тіктірген екен. Тоқа Сапақ қызының, Алтай Алдажұман қызының сәукелесінен де артық болсын депті. Жасаған ұсталар жүз биенің құнына пұлын жеткіз деген екен. «Асқа барғанның бәрінен биік боламын» деп сәукелені басына киіп, түйеге мініп келген екен. Өзі бір үйде жалғыз жатады екен де, сәукеле басында, үлкен құс жастық арқасында, аяқ жағында есіктей айна қойдырып, өз түрін өзі айнадан көріп «бар түрің осы ма, бар болғаның осы ма, ішіңді ұрайын» деп айнаға қарап, ернін шығарып, өз-өзін келемеждеп жатады. Сақау кіріп барып, өлеңді қоя береді. «Үйден барып қысырақ ал, жүзді ал, мыңды ал» дейді сал. «Басыңдағыны бермесең, тіпті алмаймын» деп бұл да өлеңмен әліне қоймай бүріп кетті. «Өзіме де сүйкімсіз болып, түрімді бұзып жатыр еді… Ішіңе ұрайынды әрмен алып кетші, көрмегенім осы болсын» деп басынан жұлып алып, есікке қарай лақтырды дейді.
Өтебай салды Мәшһүр Жүсіп «жынды» деп сипаттайды. Өйткені сал-серіні «жынды» деу бұрыннан бар. Сонымен Өтебай сал кім? Арқа жерінде көптеген сал-сері өткені белгілі. Әрқайсысының аңызы бір-бір дастан. Сол сияқты Өтебай сал туралы жеткен там-тұм жазба деректердің өзі оның асқан сал образын көз алдыңа әкеледі. Басына жүз байталдың құнын төлеп тіктірген сәукелесін «өзіме де сүйкімсіз болып, түрімді бұзып жатыр еді… Әрмен алып кетші, көрмегенім осы болсын» деп басынан асырып, есікке қарай лақтыру үшін адам қандай болуы керек?
«Баянаулада көркейіп шыққан салдардың ең ұлысы Өтебай сал (XVIII-XIX ғғ.)» деп жазыпты академик Әлкей Марғұлан «Қазақтың сал, серілік дәстүрі» деген мақаласында.
Ал қаламгер Әліп Смақ: «Өтебай сал – ел арасында аты аңызға айналған өнерпаз. Көптеген әдеби шығармаларда ол кісінің ерекше киінгенін ғана айтады. Өтебай шәкірт тәрбиелеген өнерпаз екенін білеміз. Жоғарыда айтылған Бақмағанбет, Сейфоллалар оның шәкірті, болмаса шәкіртінің шәкірті», – деп сипаттайды.
(Мұндағы Сейфолла деген кісі Сәкен Сейфуллиннің атасы, атақты күйші сері болған адам).
Сәукеленің құны
Мәшһүр Жүсіптің «Тоқа Сапақ қызының, Алтай Алдажұман қызының сәукелесінен де артық болсын депті» деген дерегіне қарап, ол замандағы асқан байлардың қызына деген құрметін байқауға болады. Байлар дәулетін көрсеткісі келеді деп қарауға болмайтын секілді. Өйткені қазақ қызды «қонақ» деп қадірлейді. Сондықтан ХVIII ғасырда қазақтардың қыз балаға, жалпы әйел затына деген құрметі жоғары болды деуге негіз бар. Себебі байлары қыздарына кигізген сәукеленің төменде келтірген құнына қараңыз: Бірінші, Мәшһүр Жүсіп Көпейұлының сәукелеге қатысты дерегінше, XIX ғасырдың алғашқы жартысында кіші жүздің Байсақал деген байы мен Орта жүздің Сапақ байы құда болыпты. Байсақал құдаларына қыздың сәукелесін жіберіп: «Басқа ештеңе сұрамаймын, тек осы бір сәукеленің бағасын өздері есептеп берсе болды» дейді. Сонда Кенесары ханның ағасы Саржан төре: «Бұл сәукеленің бағасы 500 байтал болады екен, сондықтан қызының қалыңмалы 500 жылқы» деп кескен екен.
Екінші, сәукеленің құны туралы «Ш.Уәлихановтың досы ғалым И.Ибрагимов былай дейді: «Сәукеле – конус тәріздес, күміс, алтын тиындармен және меруерт маржандармен әшекейленген биік баскиім. Ұзындығы – 1,5 аршын… Тойға арналған бас киімді тұрмысқа шыққаннан кейін алғашқы кезде бір жылға жуық уақыт киеді, содан соң оны шешіп, тек үлкен тойларда ғана киеді, оның өзі төрт немесе бес жыл аралығында. ХІХ ғасырда қымбат сәукеле 1 000 рубль немесе 100 жылқыға тең болған».
Үшінші, академик ғалым Әлкей Марғұлан: «Ақмола, Көкшетау, Солтүстік Қазақстан облыстарынан және Атбасар уезінен барған алтын шашақтары бар жібекпен көмкерілген сәукелелер Петербургте өткен шығыстанушылардың ІІІ конгресінде көрмеге қойылады. Оларды Шыңғыс Уәлиханов, Мейрам Жанайдаров, Сандыбай Шапанов жеткізді. С.Шапановтың сәукелесі 600 рубльге бағаланды», – дейді.
Төртінші, М.Орманов деген сұлтанның ұзатқан қызының сәукелесін 389 рубльге бағалағаны жайлы дерек бар.
Тере берсек мұндай дерек көп. Бірақ осы төрт мысалға қарап, ХVIII- XIX ғасырда сәукеленің қаншалықты бағалы болғанын бағамдауға болады. Сонымен, осынша қымбат бұйымдар қайда кетті? Ел іші – алтын кеніші. Бәлкім, сандықтардың түбінде жатқан шығар? Алайда өз аяғым жеткен Қазақстандағы музейлердің көбін аралап көрдім. Әзірге мұндай қымбат сәукеле кездеспеді. Музейтанушылардың да бұл жайлы хабары аз.
«Осыдан бірнеше жыл бұрын елордадағы Ұлттық музейге саясаткер Иманғали Тасмағамбетовтің жеке күміс коллекциясы көрмеге қойылғанда ғана күміспен көмкерілген көне әрі оригинал сәукеле қойылған», – дейді музей қызметкерлері.
Ал Ұлттық музейдің өзінде бірде-бір оригинал сәукеле кездеспейді.
Қымбат сәукелелердің қайда кеткені жайлы академик ғалым Әлкей Марғұлан жазған. Оның айтуынша, патшалық Ресейдің отарлау саясаты «қайта бағалау» деген желеумен тарихи сәукелелердің жоғалып кетуіне әкелген. Ең бағалы сәукелелер шетелдерге жіберілген көрінеді. Атап айтқанда, әлемдегі ең үлкен музей орталығы – Санкт-Петербургтегі құнды мұралар сақталған атақты Антропология және этнография музейі (Кунсткамера) және Кеңес заманында КСРО халықтарының этнография музейі (МАЭ) деп аталған Ресей этнографиялық музейі (РЭА), Татар (Қазан) АССР Орталық музейінде, Омбы, Ташкент музейлерінде сақталған.
Ал тарихта 1718 жылы I Петр жарлығына сай, кімде-кім патша коллекциясына көне бағалы бұйымдар тапсырса, патшадан шен-шекпен алып марапатталған. Осы жарлықтың аясында әр өңірден жиналған 250 дана, 30 келідей құнды бұйымдар Петр атындағы Антропология және этнография музейіне (Кунсткамераға) жіберілсе, кейіннен 1859 жылы Эрмитажға ауыстырылады. Дәл осы сияқты сәукелені Қазақстаннан жаппай шығару XIX ғасырдың екінші жартысында басталды. Шыңғыс Уәлиханов, Мейрам Жанайдаров, Сандыбай Шапанов секілді қазақ сұлтандарының күшімен олар 1876 жылғы Санкт-Петербургтегі шығыстанушылардың үшінші конгресінің әйгілі көрмесіне қойылады. 1893 жылы Нижний Новгород көрмесіне де құнды экспонаттар барған. Ал ол бұйымдар 1903 жылы Мәскеуде өткен халықаралық көрмеде қайтадан қойылған. Ресейдегі Антропология және этнография музейінде (Кунсткамера) «Бір жәдігердің әлемі» атты көрме өтіп тұрады. 2001 жылғы этнографиялық көрмеде қазақтың сәукелесі ең үздігі болып бағаланды. Өйткені музейдегі ең көне әрі ең құнды зат (№439-21 нөмірлі) сәукеле болыпты. Бұл Абылай ханның ұрпақтарының сәукелесі деген дерек бар. Сәукеле құны заманында 1 000 рубльге (100 жылқы) бағаланыпты. Биіктігі жарты метр, салмағы үш келіге жетеді екен. Сәукелені музейге 1899 жылғы қаңтарда Лайықжан Беркімбаев және Хасан Имамбаев деген қазақтар алып барған. Олар Санкт-Петербургқа барған бір сапарында Кунсткамерада сақталған қазақ жәдігерлерін байқайды. Сөйтіп, елге келген соң қазақтың тұрмыс-тіршілігі, әдет-ғұрпына қатысты жәдігерді бірін сұрап, енді бірін сатып алған Лайықжан мен Хасан Ақтөбе уезінің Торғай болысы мен Қостанай уезінің Сарай болысы қазақтарынан бас-аяғы 88 дүниені жиып, Кунсткамераға өткізеді. Көрмеге барған бұйымдар қайтып қазақ топырағына сол күйі оралмаған…
«Қайран қазағым-ай! Дүниеден алар бар еншің осы ма еді?!»
Ақын Тыныштықбек Әбдікәкімұлы: «Шындығында, ежелде еркектер де қарқара, яғни сәукеле киген. Оны сұңғыла суретші Ағымсалы Дүзелханов ағамыздың суреттерінен көруге болады. «Сәу(ке)ле» деген бүлінгі сөздің де түпнұсқасы – «Сәуле». Күннің ертедегі бір атауы. Балтық жағалауындағы елдерде ол «Саул» түрінде келеді. Күн культін тұтынған күнтекті еліміздің дүниетанымы сондай ғажап болған. Қазақтың қыздары ғана емес, әйелдері де сәукеле киген. Ал біз оны тек қалыңдыққа ғана басыбүтін беріп қойдық», –дейді.
Расында, белгілі қылқалам шебері, Мемлекеттік сыйлықтың иегері Ағымсалы Дүзелхановтың картиналарының дені – сәукеле киген арулар галереясы. Оның әр картинасындағы сәукеле киген арулардың ұлттық бейнесі қазақтың ерте ерлік тарихынан сыр шертеді.
Ал қазақ киносының шоқ жұлдызы – Шәкен Аймановтың «Қыз Жібек» фильміндегі Жібектің сәукелесі Жайыққа ағып бара жатқан эпизодын ұмыту мүмкін емес.
«Түпнұсқасында көш біреу емес, бірнешеу. Көрсетіліп жүрген нұсқасында ақ боз ат бос келеді де, фильм бітеді ғой. Түпнұсқада ақ боз ат оралғаннан кейін Қыз Жібек өз отауына келіп, Төлегенді елестетіп жылайды. Бәрімен қоштасқандай болып, Жайықтың жағасына келеді. Судың бетінде сәукелесі қалқып қалады. Жоңғар батырлары сәукелені найзасымен тұс-тұстан жұлмалайды. Менің ойымша, фильмнің шарықтау шегі – осы эпизодта. Естуімше, фильмнің премьерасы жүріп жатқан кезде киномеханиктің қасына КГБ-нің бір адамы отырып қадағалапты. Төлегеннің өлер алдында айтар сөзі бар ғой: «Қайран қазағым-ай! Дүниеден алар бар еншің осы ма еді?!» дейтін. Осы тұсты сценарийге енгізген – Асқар Сүлейменов», – дейді бір естелігінде Төлегеннің рөлін сомдаған әйгілі актер Құман Тастанбеков.
Сондай-ақ ақын Омарғазы Айтанның «Сәукеле» деген жыр жинағындағы «Сәукеле» өлеңінде ақын патшаның тәжін сәукеленің садағасы дейді. Аналардың алтын басын патшаның тәжінен биік қояды.
***
Осынша қисапсыз қилы тағдырды бастан кешкен қазақ әйелінің асыл тәжі – сәукеле жайлы айтылар сөздің басы да, соңы да бұл емес. Этнограф, тарихшы ғалымдарымыз бұған әлі де тереңірек үңіліп, отарлық дәуірдің қойнауына сіңген ұлы әжелеріміздің шерлі де шежірелі тарихын ақтаңдақтардан аршиды деп үміттенеміз. Бұл ретте, мемлекет тарапынан зор қолдауды қажет етеді. Осынау тәуелсіздік жылдарында ел қоржынын олжалы қылған «Мәдени мұра» бағдарламсы секілді кешенді жоба керек-ақ. Өйткені осынау мақаламызға арқау болған Зағи апаның күміс сәукелесін іздеу барысында мынадай жайтқа қанық болдық. Іздестіру нәтижесінде көне бұйымның бір дерегін таптық. Таптық та қуандық, қуандық та мұңайдық. Жоғарыда айтып өткен Қалақ апаның ұрпақтары талай зобалаң күндерде де күміс сәукелені шаңырақтың киесі тұтып, сандықта сақтап жүріпті. Тіпті, бұл жайлы бөтен адам түгілі, бала-шағаға да айтпай құпия сақтаған. Ел тәуелсіздік алып алыс-жуықтағы ағайын атажұртқа ауа көшкен алғашқы жылдары Бабаш молданың балалары да қазақ еліне қарай көш түзейді. Айналып атажұртына келе жатқан күміс сәукеле тағы да «қуғынға» ұшырайды. Кеңестік қақпақылдан аман құтылған көне жәдігер бәрібір Ресей шекарасында «ұсталады». Қазақстан көші-қон заңында шетелден көшіп келетін қандастар өз дүние-мүлкімен көшіп келуіне шектеу қоймайды. Бірақ Ресейдің кедендік талабы бөлек. Тек бұл күміс сәукеле емес, атақты Тоқты бақсының киелі қара қобызы да осы Ресей шекарасында қолды болған деген дерек бар. Сол сияқты ата-бабасынан мирас болып қалған талай көне бұйымдарынан айырылып қалған ағайын көп.
Бақытбек ҚАДЫР