Германияның Магдебург қаласында Қазақстанның Құрметті консулдығы ашылды, – деп хабарлайды madeniportal.kz СІМ баспасөз қызметіне сілтеме жасап. 

Бұл лауазымға Феликс фон Лимбург тағайындалды. Саксония-Анхальт жеріндегі жаңа кеңсенің алдында тұрған міндет-межелер жайлы тілші бейнематериалында. Консулдықтың ашу салтанатына саясаткерлер мен кәсіпкерлер, Германиядағы өзге елдің дипломаттары қатысты.

Жаңа кеңсенің мақсаты – Қазақстан мен Германия арасындағы қарым-қатынасты арттырып, ел экономикасына инвестиция тарту. Бұл өңірде ауыл шаруашылығы, химия өндірісі жақсы дамыған. Сондай-ақ білім мен туризм саласындағы байланыстарды бекемдеуге мүмкіндік мол.

Жалпы, қазір Қазақстанның Германияда 4 құрметті консулдығы бар. Олар Гамбург, Штутгарт, Ганновер және Дортмундта орналасқан.

Аталған аймақта еліміздің құрметті консул міндетін 30 жылдан бері кәсіппен айналысып келе жатқан танымал бизнесмен Феликс фон Лимбург атқарады. Оның компаниясы құрылыс саласында инновациялық шешімдерді жүзеге асырады. Кәсіпкер екіжақты экономикалық байланыстарды нығайтумен қатар мәдени-гуманиатрлық ынтымақтастықты кеңейтуге ниетті.

Тараптар Құрметті консулдықтың ашылуы екіжақты қарым-қатынасты бекемдеп, жаңа мүмкіндіктерге жол ашыларына сенімді. Бұл қадам Қазақ еліне қосымша инвестиция мен озық технология тартып, бірлескен жобаларды көбейтуге мол мүмкіндік бермек.