Қазақстанда елдімекендерді қоса алғанда 700-ге жуық мектеп кітапханасы жөндеуден өтеді

Еліміздегі қалалар мен елдімекендерде 1000 мектепті жаңғырту жұмыстары аясында кітапханалар да жөндеуден өтеді, деп хабарлайды MADENIPORTAL.KZ.

Оқу-ағарту министрлігі бұл жұмыстар қала мен ауыл арасындағы алшақтықты азайтуға, балалардың оқу мен тәрбиесіне жайлы жағдай жасауға, мектептердің материалдық-техникалық базасын нығайтуға бағытталған жеті негізгі бағытты қамтитынын атап өтті. Осы жұмыстар аясында биыл 700-ге жуық мектеп кітапханасы жөндеуден өтеді. Бұл шамамен 300 мың балаға заманауи және қолайлы кітапхана кеңістігін пайдалануға мүмкіндік береді.

Мектептерде кітаптарды автоматты түрде есепке алатын және жедел іздейтін RFID технологиясы енгізілуде, ал 20-дан астам кітапханада сканерлеуші роботтар жұмыс жасайды. 2023 жылдан бастап «Балалар кітапханасы» жобасы аясында мектеп кітапханаларының қоры 1,6 миллион дана көркем әдебиетпен толықты. Бүгінде жалпы кітап қоры 141 миллион данадан асады. 

Кадр даярлауға ерекше көңіл бөлініп отыр. Мәселен, тек 2024 жылы 1 775 мектеп кітапханашысы біліктілікті арттыру курстарынан өтті, ал 2025 жылы оқу жалғасады. Бұл — мектеп кітапханаларын балалар үшін шынайы білім мен қарым-қатынас орталығына айналдыру жолындағы маңызды қадам. 

Еліміздегі тұңғыш кітапхана 152 жыл бұрын 1871 жылы Орал қаласында ашылған. Ал, сирек қорлар мен қолжазбаларға бай кітапхана ретінде - Абай атындағы Абай облыстық әмбебап кітапханасын айтуға болады. Сонымен қатар, кітап қоры ең үлкен кітапхана – Алматы қаласындағы ҚР Ұлттық кітапханасы. Онда 7 миллионнан астам кітап бар. Жоғарыда айтылған стандарттарға сай кітапхана ретінде, Астанадағы ҚР Ұлттық академиялық кітапханасын атауға болады. Себебі, ол цифрлы және электронды контент бойынша еліміздегі ең үздік кітапхана саналады.