Ақтөбеде анасын өлтірген жасөспірімге «шизофрения» диагнозы қойылды

Ақтөбеде анасын пышақтап өлтіріп, әжесін жаралаған 16 жастағы жасөспірімге «шизофрения» диагнозы қойылды. Бірнеше айға созылған психиатриялық сараптама қорытындысынан кейін оның психикалық дертке шалдыққаны анықталған, деп хабарлады MadeniPortal.kz

Бұл туралы КТК жазды. Іс бойынша сот процесі басталды. Алайда жасөспірімнің өзі сот отырысына қатысқан жоқ. Қазіргі уақытта ол Талғардағы психиатриялық ауруханада ем қабылдап жатыр.

Қайғылы оқиға былтыр Жаңа жыл қарсаңында болған. Тергеу дерегіне сәйкес, жасөспірім 41 жастағы анасына ашуланып, оған пышақпен шабуыл жасаған. Әйел алған жарақаттарынан көз жұмды. Анасына араша түспек болған әжесі де бірнеше жерінен жарақат алған.

Іс бойынша жәбірленуші ретінде жасөспірімнің әжесі танылған. Оның айтуынша, немересі бұған дейін сабақты жақсы оқып, түрлі олимпиадаларда жүлделі орындарға ие болып жүрген. Алайда кей кездері оның мінез-құлқы өзгеріп, ашуға берілетін сәттері байқалған. Отбасы мұны жасөспірімдік өтпелі кезеңмен байланыстырып келген.

Сараптама жасөспірімнің психикалық дертін анықтағандықтан, сот процесі ұзаққа созылмауы мүмкін. Келесі отырыста сот оны қылмыстық жазадан бұрын мәжбүрлі емдеуге жіберу мәселесін қарастырады деп күтіліп отыр.

Ал шабуылдан зардап шеккен әжесі немересін жамандыққа қимайтынын жеткізді.