“Атақ үшін ойнадық” деген көкпаршыларға бас-басына 5 миллион теңге беріледі

Дайындықты ақпанда бастадық. Алдымен құрама команда жасақталды. 6 кезеңнен тұратын оқу-жаттығу өткіздік. Көкпар мен көкбөріден 12 адамнан тұратын бөлек-бөлек топ бар. Дайындық жоғары деңгейде болды, ол медициналық, психологиялық, техникалық бағытты қамтыды. Біздің спортшылар ойындарға толық дайындықпен келді, - дейді Қарлығаш Рамазанова.

Қырғызстанда ойындар үш рет өтті. Ол кезде біз жалпыкомандалық есепте күміс және қола медаль алдық. Қазақстанда ойындар 21 спорт бойынша өтіп жатыр, оның ішінде он спорт – біздің ұлттық ойындар. Сол ойындар бойынша жарыстың алғашқы екі күнінде 27 алтын алдық. Бұл біз үшін өте жоғары нәтиже. Жалпы есеп бойынша қарсылас командадан бірнеше есе көп медаль алдық. Әлі де жалғасып жатыр, - дейді ол.

Көкпар федерациясының президенті Бауыржан Исабаевтың атынан сыйақы бар. Егер Қазақстан командасы көкпардан бірінші орын алса, әрбір көкпаршы (12 адам) мен жаттықтырушысына (3 адам) 5 млн теңгеден беріледі, - дейді Рамазанова.

Арыз-шағым кез келген жерде болады. Ат спортында спортшы мен жылқы бірлесе жаттығуы керек. Атты Қазақстан тарапы ұсынып отырғандықтан, кей елден келген азаматтар берілген жылқыны басқаруды білмейді. Соған байланысты шағым болды. Ер адамдардың арасындағы спортта жарақат алу да болып тұрады. Жалпы алғанда қауіпсіздікпен толық қамтамасыз етіп отырмыз, - дейді Рамазанова.