«Балаларымыз ес-түсінен айырылып барады»: Жанарбек Әшімжан Бектеновке шұғыл сауал жолдады

Құрылтай депутаты Жанарбек Әшімжан Премьер-министр Олжас Бектеновке депутаттық сауал жолдап, балалар мен жасөспірімдердің әлеуметтік желіге шамадан тыс әуестенуі және оның салдары туралы мәселе көтерді, деп хабарлады MadeniPortal.kz.

Депутат Құрылтайдың пленарлық отырысындағы алғашқы депутаттық сауалын әлеуметтік желіге телмірген жастар мен балаларға арнағанын айтты.

Жанарбек Әшімжан келтірген дерекке сәйкес, 2023 жылы ЮНИСЕФ Балалар қорымен бірлесіп жүргізілген зерттеу нәтижесінде Қазақстандағы 9–10 жастағы балалардың 60 пайызы, 11–12 жастағы балалардың 66 пайызы әлеуметтік желілерде аккаунт ашқан. Ал балалардың 88 пайызында жеке смартфон бар. Соның арқасында олар TikTok, YouTube және Instagram секілді танымал платформаларды еркін пайдаланып отыр.

Депутат кибербуллинг көрсеткішінің күрт өскеніне де назар аударды. Оның сөзінше, балалардың әл-ауқаты индексіндегі деректер бойынша, 10–18 жас аралығындағы әлеуметтік желі арқылы буллингке ұшыраған балалардың үлесі 2024 жылғы 15 пайыздан 2025 жылы 33,5 пайызға дейін өскен.

Осыған байланысты депутат Үкіметке бірқатар нақты ұсыныс жолдады. Ол 16 жасқа дейінгі балалардың әлеуметтік желіге тіркелуіне шектеу қою тетігін нақтылауды, балалардың жеке және цифрлық деректерінің қауіпсіздігін қамтамасыз етуді сұрады.

Сондай-ақ мектептерде цифрлық гигиена, медиасауат және әлеуметтік желіні қауіпсіз пайдалану дағдыларын жүйелі түрде оқыту ұсынылды.

Бұдан бөлек, Жанарбек Әшімжан әлеуметтік желілердің балалардың психологиялық жағдайына, ұйқысына және оқу үлгеріміне әсерін тұрақты зерттейтін ұлттық мониторинг жүйесін енгізу қажеттігін айтты.

Депутаттың пікірінше, балаларды әлеуметтік желідегі қауіптен қорғау үшін шектеу енгізумен ғана шектелмей, оның іс жүзінде қалай орындалатынына дейін нақты тетік әзірленуі қажет.