"Балаларыңызды тартып аламыз": Жалғызбасты анаға пранк жасаған "Харекет" қоры сынның астында қалды

Желі қолданушылары жалғызбасты ананы “балаларыңды тартып аламыз” деп қорқытып, пранк жасаған “Харекет” қорының әрекетіне наразылық білдіруде, деп хабарлайды MadeniPortal.kz. 

“Харекет” қоры жариялаған видеода үш баласы бар жалғызбасты ананың ауыр тағдыры көрсетілген. Видеода байқағандай үйге Ақмарал Басирова келіп, өзін “балалардың құқығын қорғау комитеті қызметкерімін” деп таныстырып, үйдің жағдайын сұрайды. Соңында балалар мұндай үйде өмір сүре алмайтынын және оларды алып кететінін айтады. Ана балаларын құшақтап, бермейтінін айтып жылайды. Балалар мен ананың жылаған кадрлары көптің көңілін босатты. Осы кезде Басирова кілтті ұсынып, оларға жаңа пәтер берілетінін түсіндіреді.

Дегенмен, әсерлі видеоның артында балалардың сол сәттегі қорқынышы жатқанын ескерген желі қолданушысы Шалқар Қуанышбаев балаларды қорқытуға болмайтынынжазған. 

Одан бөлек, желіде пікір жазушылардың көпшілігі маркетинг жұмысын өзгерту керегін айтады.

“Контент үшін ғой. Қазіргі маркетингте адамгершілік, эмпатия жоқ дерсің. Пранк/сранксыз-ақ, садақаны саламыз ғой”, “Мынау пранк басынғандық және бассыздық! Кімнің идеясы болса да, адамгершіліктен жұрдай екен. Халықтың ақшасы – аманат! Ойнап есерсоқтанып, мұқтаждың мұңымен ойнасын деп берген жоқ. Анасының моральды қалай қиналғанын елестету де қиын. Өзі қиналып тұрғанда”, “Балаларды видеоға түсірудің не қажеті бар? Үй алып, көмектестіңіздер, көп рахмет. Алайда мұның бәрін жарияға көрсетіп, балалардың түрін салып керек емес”, – деп жазды желідегілер.