БҚО-да қызылша ауруының көрсеткіші күрт өсті

БҚО-да 2026 жылы қызылшаға күдікті 29 жағдай анықталды, олардың 25-і зертханалық түрде расталды, деп хабарлады MadeniPortal.kz.

Ауырғандардың басым бөлігі – 14 жасқа дейінгі балалар (24 жағдай), сондай-ақ бір жасқа толмаған екі нәресте.

2025 жылдың осыған ұқсас кезеңінде бар болғаны екі ғана жағдай тіркелген.

БҚО санитариялық-эпидемиологиялық бақылау департаментінің басшысы Динара Жанабергенова қызылшаның жоғары қызумен, уыттанумен, мұрыннан су ағумен, көздің қабынуымен және кезең-кезеңімен шығатын бөртпемен сипатталатын жедел вирустық ауру екенін еске салды. Алдымен бөртпе бет пен мойында пайда болып, кейін дене мен аяқ-қолға таралады. Жалпы әлсіздік, бас ауруы, тәбеттің төмендеуі, ұйқының бұзылуы байқалады.

Облыстың бас мемлекеттік санитариялық дәрігері ата-аналарға баланың қызылшаға қарсы егілген-егілмегенін тексеруге кеңес берді. Егер егілмесе – вакцинациядан өту қажет. Алғашқы белгілер (дене қызуының көтерілуі, бас ауруы, әлсіздік, мұрыннан су ағу, жөтел, бөртпе) пайда болғанда бірден дәрігерге қаралып, тексеруден өтіп, оның ұсынымдарын қатаң сақтап, өздігінен емделмеу керек.

Еске сала кетейік, 2025 жылдың қорытындысы бойынша 2024 жылмен салыстырғанда Қазақстанда қызылшамен сырқаттанушылық 85%-ға төмендегеніне қарамастан, 2025 жылғы қарашадан бастап ауру жағдайларының саны қайтадан өсе бастаған. Ауырғандардың басым бөлігі – екпе алмаған балалар. Науқастардың 79%-ы қызылшаға қарсы егілмеген, 8%-дан астамы вакцинацияның толық курсын алмаған.