Дінді жамылып қылмыс жасаған: Қазақстанда 64 адам қолға түсті

Қазақстанда жыл басынан бері дін атын жамылып, түрлі қылмыс жасаған 22 қылмыстық топтың 64 мүшесі ұсталды. Бұл туралы Ішкі істер министрлігі мәлімдеді, деп хабарлады MadeniPortal.kz. 

ІІМ мәліметінше, күдіктілер бопсалау, алаяқтық, тонау, браконьерлік және есірткі өткізу секілді қылмыстармен айналысқан. Олардың бірқатарынан қару-жарақ та тәркіленген. Мұндай топтар Алматы қаласында, Ақтөбе, Атырау, Жамбыл, Маңғыстау және Батыс Қазақстан облыстарында анықталған.

Жалпы діни экстремизм идеяларын ұстанушылардың 155 қылмысқа қатысы бар екені анықталған. Олардан 114 атыс қаруы, 3 суық қару, 7 граната, 1600-ден астам оқ-дәрі және 32 келіден астам есірткі тәркіленді.

Мәселен, Алматыда дінді жамылған төрт адам қала тұрғынының 7,5 млн теңгесін иемденген. Сот оларды 5 жылдан 6 жылға дейін бас бостандығынан айырды. Петропавлда радикалды көзқарастағы әйел төрт алаяқтық дерегі бойынша кінәлі деп танылып, 3 жылға сотталған. Ал Павлодар тұрғынының 17 алаяқтық дерегіне қатысы анықталып, ол 5 жылға бас бостандығынан айырылған.

Сонымен қатар полиция интернетте радикалды идеологияны насихаттау және экстремистік сипаттағы қылмыстарға қарсы жұмысты жалғастырып жатыр. Ақтөбеде діни араздықты қоздырған тұрғын 3 жыл 6 айға, терроризмді насихаттаған тағы бір азамат 6 жылға сотталған.

Түркістан облысының тұрғыны «Өзбекстан ислам қозғалысы» халықаралық террористік ұйымының идеяларын таратқаны үшін 7 жылға бас бостандығынан айырылған.