Елімізде 142 көпір апатты жағдайда тұр

Қазақстанда 142 көпір апатты жағдайда тұр, оның 141-і жергілікті маңызы бар жолдарда орналасқан. Тағы 420 көпірдің жағдайы қанағаттанарлықсыз. Осыған байланысты Құрылтай депутаты Тұрарбек Төлемісов көпірлерді жөндеу және қайта жаңғырту бойынша бірыңғай бағдарлама әзірлеуді ұсынды, деп хабарлайды MadeniPortal.kz dalanews.kz-ке сілтеме жасап. 

Депутаттың айтуынша, Мемлекет басшысы Қасым-Жомарт Тоқаев жол сапасын елдің «ахиллес өкшесі» деп атаған. Бұл баға жергілікті маңызы бар жолдардағы көпірлердің жағдайына да қатысты. 2026 жылғы 1 қаңтардағы мәлімет бойынша, Қазақстанда 3 623 көпір құрылысы есепке алынған. Оның 1 488-і республикалық маңызы бар жолдарда, ал 2 135-і жергілікті жолдарда орналасқан. 

Тұрарбек Төлемісовтің мәліметінше, апатты көпірлердің ең көбі Қызылорда және Түркістан облыстарында тіркелген. Қызылорда облысында 87, Түркістан облысында 50 көпір апатты жағдайда тұр.

Сонымен қатар Ұлытау облысында 24 көпірдің 21-і, Батыс Қазақстан облысында 51 көпірдің 44-і қанағаттанарлықсыз жағдайда.

Депутат жергілікті жолдардағы көпірлердің тек 31,5%-ы жақсы жағдайда екенін атап өтті. Ал республикалық маңызы бар жолдардағы бұл көрсеткіш 50,5%-ды құрайды.

Осыған байланысты депутат 2027–2031 жылдарға арналған көпірлерді күтіп ұстау және қайта жаңғырту жөніндегі бірыңғай бағдарлама әзірлеуді ұсынды. Оның айтуынша, бағдарлама республикалық, облыстық және аудандық маңызы бар жолдарды қамтуы керек. Оны жүзеге асыруға облыс әкімдіктері қатысып, өңірлік жоспарлар әзірлеуі қажет. Сондай-ақ депутат жергілікті жолдардағы көпірлерді бірыңғай әдістеме бойынша түгендеп, паспорттауды және оларға көпірлерді пайдалануын басқару жүйесін енгізуді ұсынды. 

Бұдан бөлек, ол апатты жағдайда тұрған 142 көпірдің әрқайсысында қауіпсіздікті қамтамасыз ету үшін қандай шаралар қабылданғаны, жобалық-сметалық құжаттаманың бар-жоғы және жөндеу жұмыстарының қашан басталатыны туралы ақпарат беруді сұрады. 

Төлемісов 2023–2026 жылдары көпір құрылыстарына нақты қанша қаражат жұмсалғаны және 2031 жылға дейін қажетті қаржыландыру көлемі туралы есеп ұсынуды да талап етті.