45 млрд теңгенің мұнайы заңсыз сатылған: Қазақстанда бес адам сотталды

Қазақстанда 45 млрд теңгеге бағаланған мұнай өнімдерін шетелге заңсыз экспорттаған ұйымдасқан қылмыстық топтың әрекеті әшкереленді. Қылмыстық іске қатысы бар бес адам сотталып, негізгі ұйымдастырушы халықаралық іздеуге жарияланды, деп хабарлайды MadeniPortal.kz Ұлттық қауіпсіздік комитетіне сілтеме жасап.

Тергеу мәліметінше, заңсыз бизнесті Маңғыстау облысының кәсіпкері ұйымдастырған. Ол жер қойнауын пайдаланушы компаниялардан шикі мұнай сатып алып, оны «Standart Petroleum» және «Mangystau Oil Refining» шағын мұнай өңдеу зауыттарында өңдеткен.

Кейін дайын өнімге жалған сапа паспорттары рәсімделіп, мұнай өнімдері пеш отыны ретінде көрсетілген. Осылайша олар Ақтау теңіз порты арқылы танкерлермен шетелге заңсыз шығарылып отырған.

ҰҚК дерегінше, 2019–2023 жылдар аралығында тек «Batys Nefte Trade» ЖШС арқылы 160 мың тоннадан астам мұнай өнімі заңсыз экспортталған. Операциялардың жалпы құны шамамен 45 млрд теңгені құраған. 2026 жылы жүргізілген тергеу шаралары барысында қылмыстық іске қатысы бар адамдардың активтері, шағын мұнай өңдеу зауыттары, танкер және басқа да мүлік тәркіленді.

Сонымен қатар заңсыз алынған табыс пен төленбеген салықтар есебінен мемлекет пайдасына 2 млрд теңгеден астам қаражат өндірілді.

Ақтау қалалық сотының үкімімен ұйымдасқан қылмыстық топтың бес мүшесі, оның ішінде мұнай өңдеу зауыттары мен трейдерлік компанияның басшылары сегіз жылға бас бостандығынан айырылды.

Ал қылмыстық схеманың негізгі ұйымдастырушысы әлі қолға түскен жоқ. Ол халықаралық іздеуде жүр.