«Арызын қайтарып алуға көндірген»: Астанада автотұрақта бұрынғы күйеуі өлтірген әйел туралы тың дерек айтылды

Астанада қаза тапқан Жазира есімді әйелдің әпкесі Жамиля қайғылы оқиғаға дейін марқұмның бұрынғы күйеуінен зорлық-зомбылық көргенін және полицияға жүгінгенін айтты. Оның сөзінше, ажырасқаннан кейін де ер адам Жазираға жақындауға тыйым салынғанына қарамастан, оны іздеп келе берген, деп хабарлады MadeniPortal.kz.

Жамиляның айтуынша, Жазира бұрынғы күйеуімен он жылдан астам бірге тұрған. Отбасындағы күрделі мәселелер шамамен бір жыл бұрын басталған. Әпкесінің сөзінше, 2025 жылғы мамырда Жазира күйеуінің телефонынан басқа әйелмен жазысқан хаттарын көргеннен кейін араларында жанжал болып, ер адам оған қол көтерген.

Марқұмның әпкесінің айтуынша, бұдан кейін де жағдай тоқтамаған. Ол бұрынғы күйеуі Жазираны көлікке отырғызып әкетіп, ұрып-соғып, тұншықтырғанын мәлімдеді.

19 қыркүйекте ерлі-зайыпты ресми түрде ажырасқан. Жамиляның сөзінше, сол уақытта ер адамға Жазираға жақындауға шектеу қойылған, алайда ол бұрынғы әйеліне бірнеше рет келген. Бірде қорқытса, енді бірде қайта қосылуды ұсынған.

Осы жағдайлардан кейін отбасы Жазираның қауіпсіздігіне қатты алаңдай бастаған. Анасы оны күн сайын жұмысқа шығарып салып, кешке қарсы алған. Жұмыстағы адамдар да әйелдің көлікке жалғыз бармауын қадағалауға тырысқан.

Марқұмның артында екі қызы қалды. Үлкені төртінші сыныпта оқиды, кішісі биыл мектеп табалдырығын аттаған. Қазір балалар Астанада анасының туыстарымен бірге тұрып, мектепке қайта барған. Отбасы қыздарға қамқоршылық рәсімдеумен айналысып жатыр.