Қарағандыда Кәріпбек Күйіковтің көрмесі ашылды

Белгілі суретші, антиядролық қозғалыстың белсендісі Кәріпбек Күйіков Семей полигоны жабылуының 30 жылдығына арналған көрме ұсынды. Экспозиция Қарағандының Достық үйінде ашылды, деп хабарлайды "Мәдениет порталы" Қарағанды облысы әкімдігінің сайтына сілтеме жасап.

«Мен шығармаларымда жан айқайын бейнеледім. Себебі, мен және менің ата-анам - ядролық сынақтардың тірі куәгерлеріміз. Мен туып-өскен Егіндібұлақ ауылы полигоннан жүз шақырым жерде орналасқан. Бала кезімде ата-анамның Семейге жиі барғаны есімде. Содан кейін олар көбінесе дала арқылы өтетін жолды қысқартып, қиып өтетін. Әрине, мұның бәрі бізге әсер етті. Өзімнің суреттерім арқылы адамдарға ядролық қарудың қауіптілігі туралы жеткізгім келеді. Елестетіп көріңізші, егер ол террористердің қолына түссе не болады? Сондықтан антиядролық қозғалыс – бұл менің бүкіл өмірім», - дейді Кәріпбек Күйіков.

«Биыл біз ел Тәуелсіздігінің 30 жылдығын атап өтеміз. Бұл күн Семей полигонындағы ядролық сынақтардан бас тартудың 30 жылдығымен тұспа-тұс келді. 1991 жылғы 29 тамызда Елбасы Нұрсұлтан Назарбаев сансыз азап шеккен ядролық жарылыстарды тоқтатып, бейбітсүйгіш ел ретінде бүкіл әлемге Тәуелсіз Қазақстан Республикасын паш етті. Атом бомбаларының жарылыстарынан кейін қандай қайғылы жағдай болғанын бәріміз есте ұстауымыз керек. Ядролық сынақтар Семей, Павлодар және Қарағанды облыстарында көрініс тапты. Жарылыстардың салдарынан біздің миллиондаған азаматтарымыз зардап шекті, ал радиоактивті жауын-шашын флора мен фаунаны жойды. Мұның бәрін ұмытпау керек», - деп атап өтті Қарағанды облысы ішкі саясат басқармасының басшысы Ерлан Құсайын.