Жолаушылар автобусы аударылып, 40 адам опат болды

Пәкістанның Белуджистан провинциясында жолаушылар автобусы шатқалға құлап, салдарынан 40 адам қаза тауып, тағы сегіз адам түрлі деңгейде жарақат алды, деп хабарлайды MadeniPortal.kz.

Қайғылы оқиға жұма күні Дханасар ауданында, Белуджистан мен Хайбер-Пахтунхва провинцияларының шекарасына жақын жерде болған. Пешавар қаласына бағыт алған автобус жүргізушісі көлікті басқара алмай, автобус терең шатқалға құлаған. Құтқарушылардың мәліметінше, апат кезінде автобуста барлығы 48 жолаушы болған.

Алғашқы ақпаратты Белуджистан үкіметінің өкілі Шахид Ринд жариялады. Кейін бұл мәліметті KP Rescue 1122 құтқару қызметі де растады. Қазіргі уақытта апаттың нақты себептері анықталып жатыр. Алдын ала болжам бойынша, жол-көлік оқиғасына автобустың шамадан тыс жолаушы тасымалдауы және жүргізушінің көлікті басқара алмауы әсер еткен болуы мүмкін.

Белуджистан – Пәкістан аумағының шамамен 44 пайызын алып жатқан, табиғи газ, алтын және мыс сияқты пайдалы қазбаларға бай өңір. Соған қарамастан, бұл елдегі әлеуметтік-экономикалық тұрғыдан ең аз дамыған провинциялардың бірі саналады. Таулы аймақтардағы жолдардың күрделі жағдайы мен көлік қозғалысы қауіпсіздігінің жеткіліксіздігі өңірде мұндай қайғылы оқиғалардың жиі орын алуына себеп болып отыр.