Алғаш рет қолданды: Иран Израильге қарсы қауіпті зымыранмен соққы жасап бастады

Алайда Израиль тарапы бұл зымыранды тосып алғанын мәлімдеді. Тегеран шабуылдардың жалғасатынын ескертті.

Ислам революциясы сақшылар корпусы (ИРСК) Израиль аумағына «Саджил» зымырандарын ұшыратқанын жариялады. Бұл – Иранның Израильге қарсы бұл қару түрін алғаш рет ұрыс жағдайында қолдануы. Атап айтқанда, бұл – Иран 15 жылдан астам уақыт бұрын жасап шығарған екі сатылы қатты отынды баллистикалық зымыран. ИРСК мәлімдемесінде бұған дейін Израиль зениттік қорғаныс жүйелерінің істен шығуына байланысты өз әуе кеңістігіне бақылауды жоғалтқанын және енді ирандық ұшқышсыз аппараттар мен снарядтар үшін «аспан ашық» екенін атап өтті.

Израиль әскері атылған зымырандардың кемінде біреуін тосып алғанын растады. Құлаған жер немесе келтірілген залал туралы мәліметтер әзірге жарияланған жоқ. ИРСК соққылардың барлау нысандарына, соның ішінде «Моссад» пен әскери барлау қызметі «Аманның» штаб-пәтерлеріне және әуе базаларына бағытталғанын мәлімдеді.

Иранның әскери қолбасшылығы қатаң мәлімдеме жасап, шабуылдарды жалғастыратынын ескертті. Олар Израиль халқына үндеу жасап, «қызыл дабылдар бір сәтке де тынбайды» деп, тұрғындарға «не паналауда қаза табу, не басып алынған жерлерден кету» арасында таңдау жасау қажет екенін айтты.