«Ер адамды 20 рет пышақтаған»: әйелі мен қызы күдікке ілінді

Аргентинада 41 жастағы автокөлік жөндеуші Альберто Федерико Араос Аресенаның өліміне қатысты қылмыстық іс тергеліп жатыр. Ер адамның өліміне оның әйелі мен 23 жастағы қызы күдікті ретінде ұсталды, деп хабарлады MadeniPortal.kz.

Clarín басылымының мәліметінше, қайғылы оқиға Аргентинаның Морено муниципалитетіне қарасты Ла-Реха қаласында болған. Полиция Сан-Николас көшесіндегі үйге келіп, ер адамның мәйітін жатын бөлмеден тапқан. Оның денесінде көптеген пышақ жарақаты болған, ал басына полиэтилен пакет кигізілген.

Оқиғадан кейін полиция марқұмның әйелі Элизабет Кастельяно мен 23 жастағы қызы Флоренсиядан жауап алған. Үйде отбасының танысы да болған.

Әйелдердің айтуынша, марқұм ұзақ уақыт бойы отбасына күш көрсетіп, психологиялық қысым жасаған. Қайғылы оқиға болған күні де олардың арасында жанжал туындаған.

Тергеудің алдын ала нұсқасы бойынша, жанжал кезінде әйелдердің бірі ер адамның мойнына пышақ сұққан, ал екіншісі оның басына пакет кигізіп, тыныс алуына кедергі келтірген. Оқиға үйдегі кәмелетке толмаған балалардың көзінше болуы мүмкін.

Сот-медициналық сараптаманың алдын ала қорытындысына сәйкес, марқұмның денесінен кемінде 20 пышақ жарақаты анықталған. Тергеушілер оның өліміне кеңірдегінің зақымдануы себеп болған деп есептейді.

Күдікті әйелдер істі жүргізіп жатқан прокурор Карина Сауседоға жауап беруден бас тартқан. Қазіргі уақытта екеуі де қамауға алынған.

Сонымен қатар тергеушілер отбасында тұрмыстық зорлық-зомбылық болған-болмағанын анықтап жатыр. Clarín мәліметінше, бұған дейін марқұмға қатысты полицияға ресми шағым түспеген. Алайда екі әйелдің денесінен әртүрлі уақытта пайда болуы мүмкін көптеген көгерген іздер анықталған.

Көршілерінің сөзінше, бұл үйден жиі айқай-шу естілген. Олар марқұмның көршілер арасында жақсы беделге ие болмағанын да айтқан.

Қазіргі уақытта оқиғаның барлық мән-жайы анықталып жатыр. Күдіктілердің кінәсі сот үкімімен дәлелденген жоқ.