«Тойдан шығып, әскерге кетті»: Желіде сарбаздың анасымен қауышқан сәті түсірілген видео тарады

«Былтырғы қыста Медеудің нағашыларында той болды. Соған бардық. Ал келесі күні балама әскерге шақыру қағазы келді. Сосын бірден баламды ертіп, аудандық әскери комиссариатқа бардым. Жылдам тексерістен өткізіп, ұлымды армияға алып кетті. Жалпы мен оған әрқашан әскерге баратынын айтып, психологиялық тұрғыда дайындадым. Үнемі Отан қорғау ісі маңызды екенін құлағына құйып келдім. Өйткені, үлкен ұлым Саятты әскерге жіберерде уайымдап, қатты алаңдаған едім. Оным бекер болып шықты. Айтпақшы ол да Ұлттық ұланның Көкшетау қаласындағы 5510 әскери бөлімінде қызмет еткен. Тіпті сол жақта жүріп тегін оқу грантын да иеленді. Міне, бүгін ағасының ізін жалғап інісі де борышын өтеп келді. Баламының әскери ант қабылдау рәсіміне бардым. Содан кейін көріп отырғаным осы. Вокзалда кезігетін күні жұмыстарыммен Астана қаласында болған едік. Бұл видео сол жерде түсірілген. Сол сәттегі сезімді сөзбен айтып жеткізу мүмкін емес. Балаларымды мақтан етемін. Енді екеуі де емін-еркін қалаған жұмыстарын істей береді. Егер әскери қызметші болуды таңдаса ол шешімдеріне де қарсы келмеймін», — деді сарбаздың анасы Гаухар Ыбырайым.

Видеоны көрген желі қолданушылары: «Бұйырса, 6 айдан соң мен де баламды осылай күтіп аламын», «Бұл ең күшті сәт», «Бұл сезімді сөзбен айтып жеткізу мүмкін емес», «Жарайсың, бауырым!» деп жазды.