«Менің достарым – менің байлығым» фестивалі өтті

Қарағанды қаласына арнайы келген әлемдік дең­гейде мойындалып, тұтас Түркі әлемінің ру­ха­ниятын, оның ішінде Қазақстан мен Қа­рағандының мә­де­ниетін алты құрлыққа таныт­қан тұлға, Қазақ­стан­ның еңбек сіңірген қай­рат­кері, Қарағандының құр­метті азаматы Дүйсен Қа­сейінов «Достарым – ме­нің бай­лығым» атты музыкалық фестивалін өт­кізді.

Құрметті қонақты 75 жылдық мерей­тойымен құт­тық­таған Қарағанды облы­сы­ның әкімі Ермағанбет Бөлекпаев Дүйсен Қасейінов көрнекті өнер қайрат­кері, педагог қана емес, сонымен қатар дарынды дипломат, мәдениетті жақын­дастыратын адам екенін атап өтті.

– Еліміздің мәдениетін дамытуға, халықаралық байла­ныс­тарды нығайтуға зор үлес қосқаныңыз үшін алғыс айта­мыз. Қарағандыда сіз еңбек жолыңызды бас­тап, өңіріміздің мә­дениетін дамытуға баға жетпес үлес қостыңыз. Сіздің ар­қаңызда біздің әртістер Америкада, Қытайда, Ресейде, Гер­ма­нияда, Фран­цияда, Италия­да, Иранда, Иракта гас­тро­ль­дік сапар­мен бола алды, – деді Ерма­ғанбет Қаб­дулаұлы.

Дүйсен Қасейінов – профессор, скрип­кашы. 2003-2004 жыл­дары Қазақ­стан Республикасы Мәдениет министр­лігін бас­қарды. Оның есімі «Әуенді Сары­арқа» халықаралық фес­тивалімен байланысты. Ол Қарағандыда 20 жылдан астам уақыт өтіп келеді.

– «Достарым – менің байлығым» фестивалінің ерек­ше­лігі – көрермендер алдында біздің еліміз бен хал­қы­мыз­ды шын жүректен құрметтейтін барлық жақын дос­та­рым өнер көр­сетеді. Қай жерде болсам да, не істесем де, Қарағанды әр­қашан менің жүрегімде. Мен мұнда жыл сайын балалық ша­ғымдағы достарыммен, сынып­тас­тарыммен, туыстарым­мен кездесуге келемін. Мен мұнда жер­лестеріме деген үлкен сүйіс­пеншілікпен фестивальдар өт­кіземін, – дейді Дүйсен Қасейінов.

Мерейтой иесі туралы достары да жылы сөздер айтты. Олар­дың пікірінше, Дүйсен Қасейінов – өнердің шека­расын жоя­тын адам.

– Дүйсен Қорабайұлын 15 жылдан бері білемін. Біз оны­мен фестивальде кездейсоқ таныстық. Ол өнердің нағыз біл­гірі. Қай жерде болмасын, ол әрқашан өз елін керемет си­паттайды. Осы кісінің арқасында біз Қарағандыға, қара­ғандылық әріптестерімізге ғашық болдық. Олар өз өнерінің сарбаздары. Елді білу үшін оның өнерін білу керек деп бекер айтылмаған, – деді Әзербайжанның еңбек сіңірген әртісі Роза Зергерли.

Өнер кешіне әлемнің үздік өнерпаздары мен еліміздің та­лантты әншілері қатысып, жиылған жұртқа рухани ләззат сый­лады. Фестиваль ҚР еңбек сіңірген мәдениет қайраткері Дүй­сен Қасейіновтың 75 жылдық мерейтойына арналды. Ол – қазақ өнерін дүниежүзіне насихаттап, оны дамытуға, ха­лық­аралық байланыстарды нығайтуға зор үлес қосқан кесек тұлға. Мерейтой иесін құттықтауға Ресей, Әзірбайжан, Ита­лия, Түркия, Өзбекстан елінен өмірдегі, өнердегі дос­тары келді. Дүйсен Қасейінов дәл осы мемлекеттермен арадағы мә­дени ынтымақты арттырғаны үшін талай марапат алған. Бұл күні Роза Рымбаева, Полад Бюль-Бюль Оглы, Ли Ен Сон, Фериаль Башель, Мансур Ташматов, Массимо Мер­челли секілді танымал өнер жұлдыздарын тыңдау үшін елі­міз­дің бірнеше өңірінен көрермендер жиналды. Әншілерді Еркеғали Рахмадиев атындағы академиялық симфониялық оркестр сүйемелдеді.

– Жан-жақты бағдарлама болғаннан кейін халықтың да на­зары көп болып тұр. Мен оған қуанамын. Алматыдан да, Аста­надан да, басқа да қалалардан келіп жатыр. Расында да мен фестиваль өткізбегелі 5 жыл болыпты. Сағындым өзім­нің достарымды, олар да мені сағынды деп ойлаймын, – дей­ді ҚР еңбек сіңірген мәдениет қайраткері Дүйсен Қасейінов.

Қарағанды облысы