Бүгін Қазақстанның еңбек сіңірген қайраткері Ақселеу Сейдімбектің туған күні

Бүгін белгілі этнограф, Қазақстанның еңбек сіңірген қайраткері, ҚР мемлекеттік сыйлық иегері Ақселеу Сейдімбектің туған күні, деп хабарлайды madeniportal.kz.

Марқұм көзі тірі болғанда 82 жасқа толар еді. Бірақ өзі болмағанмен сөзі, өшпес мұрасы соңында қол бұлғап қалды. «Асқар тау алыстаған сайын зорая түседі» деген тәмсіл бар. 

Биыл марқұмның өмірден өткеніне де 15 жыл толды. Туған жері Жаңаарқадағы қаралы жиында сол кезде Астана қаласының әкімі болған Иманғали Тасмағамбетов Ақселеуін жоқтар күн алда деп айтқан еді. 

Ақселеу Сланұлы 1942 жылы 12 желтоқсанда қазіргі Ұлытау облысы, Жаңаарқа ауданында дүниеге келген.

«Лениншіл жас» (қазіргі «Жас Алаш») газетінде әдеби қызметкер, меншікті тілші, «Орталық Қазақстан» газетінің жауапты хатшысы, «Социалистік Қазақстан» (қазіргі «Егемен Қазақстан») газетінде бөлім меңгерушісі, «Зерде» журналының бас редакторы болған.
Алтынсарин атындағы Білім проблемалары институтының директоры, Л.Н.Гумилев атындағы Еуразия ұлттық университеті журналистика факультетінде кафедра меңгерушісі қызметін атқарды. 

Жаңаарқадағы қабірінің басына мәрмәрдан ескерткіш қойылған. Құлпытасына «Көктегі күнге, жердегі еліме мейірімім қанбады» деген өзінің сөзі қашалып жазылған.