Ақтөбедегі Мәдениет басқармасының басшысы Алтынай Юнисова Instagram желісіндегі жарияланымдар оның ар-намысы мен абыройына нұқсан келтірді деп есептеп, парақша авторын сотқа берді, деп хабарлайды madeniportal.kz тілшісі aikyn.kz сілтеме жасап.

2023 жылы Мәдениет басқармасының басшысы Алтынай Юнисованың фотосы “Проблема Актобе” Instagram парақшасында бірнеше рет жариялап, оның отставкаға кетуін талап еткен. 

Алтынай Юнисова бұл ақпаратты шындыққа жанаспайды, оның ар-намысы мен абыройына нұқсан келтіреді деп есептейді. Ол "Проблема Ақтөбе" парақша авторының үстінен “ақпаратты шындыққа жанаспайды деп тану” және моральдық шығынды өтеуді талап етіп, сотқа шағым түсірді.

Талапкер мәдениет саласында 15 жылдан бері жұмыс істеп келе жатқанын, 2020 жылдан бері тиісті бөлімді басқарғанын, бірде-бір жаза көрмегенін алға тартты. Парақша авторы жай ғана өз пікірін білдіргенін, ешкімді жамандамайтынын, мемлекеттік қызметкерлер халық тарапынан айтылған сынды дұрыс қабылдай білуі керек деп сендірді.

Блогер мен шенеунік арасындағы дауда сот-психологиялық-физиологиялық сараптама тағайындады. Сарапшы зерттеп отырған мәтіндер талапкердің ар-намысын, қадір-қасиетін және беделін түсірмейді деген қорытындыға келді. Ал теріс ақпарат пікір түрінде ұсынылды.