Қызылордада жасаған қылмысы үшін Ержан Болатовтың туған ағасы кінәлі бола тұра сот отырысында інісінің құжатымен шешім шығарылған, деп хабарлады madeniportal.kz Информбюраға сілтеме жасап.

Қызылордада жасаған қылмысы үшін Ержан Болатовтың туған ағасы істі болған екен. Бірақ тергеу барысында да, адам тағдыры шешілер сот отырысында да жеке басы анықталмай, інісінің құжатымен шешім шығарып жіберген.

Осылайша, осы жылдың маусымында Қызылорда қалалық №2 соты Махамбет Болатовты ұрлық жасағаны үшін үш жылға бас бостандығынан айырады. Бірақ құжат бойынша інісін соттап жіберіпті.

Бір қызығы – баласының сотталып жатқанынан жақындары бейхабар болған. Бұл жағдайдан соң прокурорлар саусақ іздерін сараптап, қамаудағы азамат Ержан емес, туған ағасы Махамбет екені белгілі болыпты.

Қазір құжаттан жаңылысқан жағдай бойынша іс қайта қарауға жіберілді. Ал судья жаңылған жерін білуге мұрағат ақтарыпты. Онда тергеушілердің көрсеткен биологиялық сараптамасында қылмыскер «Ержан Болатов» деп көрсетілген дейді. Сот соған сай құқықтық баға бергенін жеткізді. Ал тергеу барысында ағаттықты кім жібергені ендігі тергеумен анықталатын болды. Оған дейін Ержан Болатов көлденең кісі көзіне көрінуден қорқады. Құжат бойынша қамаудағы адам болған соң жұмысқа да тұра алмайды.