Астана күніне орай Қазақстан жазушылар одағының Нұр-Сұлтан қаласындағы Жазушылар үйінде кітаптың тұсаукесері өтті. 

Тұсаукесерге Қазақстан мемлекеттік сыйлығының иегері, ақын Несіпбек Айтұлы, ақын Дәулеткерей Кәпұлы, Қазақ радиосы мен Шалқар радиосының музыкалық редакторы, сазгер, әнші Халық Ризабекұлы қатарлы зиялы қауым өкілдері және басқа да өнердегі әріптестері қатысты. 

Бұл екі кітаптің біріне Қытайдағы «Қос жеңге», «Ой, Ғайша», «Қази-ай» қатарлы тарихи әндер мен кейінгі біраз танымал әндердің тарихы топтастырылған. 

Ал екінші кітапта Қытай қазақтары жазба әдебиетінің негізін қалаушыларының бірі, ақын Таңжарық Жолдыұлы, кейінгі қазақ әдебиетінде өзіндік орнын алған Омарғазы Айтанұлы, тапқыр сөздің шеберлері, айтыскер ақын Бердіхан Абайұлы мен Құрманбек Зейтінғазыұлы қатарлы және кейінгі буын ақын-жазушылардың әдемі әзілдері мен қарымды қалжыңдары қамтылған. 

Ол бұл екі кітап сол жақтағы әзілдер мен ән тарихының толық жинағы емес екенін айтты.

Айта кетейік, Дәурен Бақытқажыұлы 1989 жылы 10 сәуірде ҚХР, Тарбағатай аймағы, Толы ауданының Ақбелдеу ауылына қарасты Жамбылқора қыстағында дүниеге келген. 

2010-2012 жылдары Күйтің қаласындағы Оқу-ағарту институтында қазақ әдебиеті мамандығы бойынша білім алған. «Қарағайбастау», «Қарағайбастау сазгерлері», «Азаттығым - ғажап күнім» алманақтарына өлеңдері енген. «Он сегіз», «Махаббат шыңы» жыр жинақтары, «Қытайдағы қазақ спортшылары» және «Моңғолиядағы халықаралық қазақ спортшылары» атты кітаптары жарық көрген. 

2018 жылы Тарбағатай аймағының орталық қаласында өзінің жеке шығармашылық ән-жыр кешін өткізген. Қазақстан тәуелсіздігінің 30 жылдығына арналған республикалық жыр бәйгесінің 1-орын иегері. 

Дәурен Бақытқажыұлы Шыңжаң қазақ тіл-мәдениет қоғамының, Шыңжаң әдебиет-көркемөнершілер бірлестігінің мүшесі. Моңғолия Баян-өлгей аймағының құрметті азаматы. Бірден екі кітапты шығарып отырған ақынның туындыларын өнердегі ағалары «бұл кішкене кітап болғанымен, салмақты жүк арқалаған үлкен еңбек» деп бағалады. 

madeniportal.kz