Форум жұмысын ҚР Ақпарат және қоғамдық даму министрі А.Балаева мен АҚШ-тың Қазақстандағы Уақытша Сенімді өкілі Джуди Куо ашты.

Іс-шара АҚШ-тың ҚР-дағы Елшілігі ұйымдастыруымен ҚР мен АҚШ арасындағы дипломатиялық қатынастардың орнағанына 30 жыл толуының қарсаңында өтуде. 

Министр өз сөзінде бұқаралық ақпарат құралдарында қазақ тілінде сапалы контент жасау – ҚР Ақпарат және қоғамдық даму министрлігі жұмысының басым бағыттарының бірі екенін атап өтті. 

Атап айтқанда, бүгінгі таңда мемлекеттік БАҚ-тағы қазақ тілді контенттің үлесі шамамен 80%-ды құрайды. Егер 10 жыл бұрын мемлекеттік тілде ақпарат тарататын 6 сайт болса, бүгінде жағдай мүлдем басқаша. Жылдан жылға қазақ тілді интернет-порталдардың саны да, оқырмандар саны да өсуде. Соңғы 2 жылда 46 жаңа сайт ашылды.

Сонымен қатар, Министр А.Балаева қазақстандық журналистердің одан әрі кәсіби өсуі қажеттігіне назар аударды. Ол өз сөзінде Министрлік жанынан бұқаралық ақпарат құралдарында жарияланатын қазақ тіліндегі контентті талдайтын жұмыс тобы құрылғанын  айтты.

Сонымен қатар, А.Балаева бүгінгі ғаламдық цифрландыру заманында интернет әлемдік дәстүрлі медианың өзгеруіне зор ықпал етіп жатқанын айтты. 

Форумға Қазақстанның түкпір-түкпірінен 100-ден астам маман қатысуда. Қатысушылар қатарында медиа-сарапшылар, блогерлер мен журналистер, БАҚ бас редакторлары мен бірінші басшылары, digital-сарапшылар мен жаңа контент жасаушылар бар.

Естеріңізге сала кетейік, QazForum қазақ тілді онлайн-медианы дамытуға, сапалы контентті арттыруға және интернет желісінің қазақ сегментіндегі өзекті мәселелерді шешу жолдарын іздеуге бағытталған бірегей алаң болып табылады.

madeniportal.kz